Оқушылар теміржолға саяхат жасады

Қыркүйек келді дегенше, абыр-сабыр басталды дей беріңіз. Көшеде, қоғамдық көлікте, аялдамада толып жүрген мектеп оқушысы. Демек, оларды қауіп-қатерден сақтау міндеті де арта түсті деген сөз.

 Жақында Маңғыстау станциясындағы желілік полиция мен әскерилендірілген теміржол күзеті қызметкерлері мектеп оқушыларын теміржол бойына экскурсия жасауға шақырды. «Назар аударыңыз – пойыз!» айлығы аясында бастауыш сынып оқушылары ұстаздарының жетекшілігімен теміржолға «саяхат» жасады. Әскерилендірілген теміржол күзетінің шұғыл әрекет ету тобы күзетшілері және желілік полиция өкілдері №1 мектептің 2-сынып оқушыларына теміржолдың қауіп-қатерін түсіндіріп, жүріс-тұрыс ережелерімен таныстырды. Мектепте басталған кездесу теміржолдың белгілерін таныстырып, перронда жаяу жүргіншілер жүретін жерлерді аралаумен аяқталды.  

– Жаңа оқу жылы басталысымен бірталай іс-шараларды қолға алудамыз. Өйткені баланың қауіпсіздігі бәрінен қымбат. Ойынның қызығымен теміржол аумағына шығып кетуі немесе пойыздың алдынан жүгіріп шығуы, астынан өтуі, пойызға тас атуы әбден мүмкін. Сондықтан полиция қызметкерлерімен бірлесіп, теміржол бойымен жүрудің тәртіп-ережелерін баланың санасына барынша түсінікті етіп жеткізуге тырыстық, – дейді Маңғыстау станциясындағы Әскерилендірілген теміржол күзеті Шұғыл әрекет ету тобы бастығының орынбасары Мәди Үндемесов.