Семейде «Көліктегі қауіпсіздік» акциясы қорытындыланды
Абай облысы бойынша меншікті тілші
Теміржол бойында балалар қауіпсіздігі күн тақырыбындағы өзекті мәселеге айналғалы қашан. Жуырда Семейдегі желілік полиция бөлімінің тәртіп сақшылары «Көліктегі қауіпсіздік» акциясын қорытындылады.
Жасөспірімдер арасындағы құқықбұзушылықтың алдын алу, балалардың беймезгіл уақытта бейсауат жүрісін болдырмау және олардың теміржол бойында жарақаттануын, жазатайым жағдайларға ұшырауын болдырмау мақсатында ұйымдастырылған акция шеңберінде Семей станциясындағы желілік полиция бөлімі аймақ көлеміндегі түрлі оқу орындарында, теміржол мекемелерінде арнайы дәріс сағаттарын өткізіп, сақтық шараларын сақтауға үндеген қыруар жұмыс жүргізді.
Айталық, бөлімшенің жол және қозғалыс шаруашылығы мамандарының қатысуымен 6 рет түсіндіру шаралары өткізіліп, үш вокзалда қызметкерлермен кездесу өткен. Сонымен қатар, станция тұрғындарымен үш мәрте жиын ұйымдастырылып, төрт рет жолаушылар пойызында «дөңгелек үстіндегі кездесу» болған. Желі бойындағы мал-жан амандығын сақтау бойынша теміржолшылардың қатысуымен арнайы дөңгелек үстел де өткізілген.
Сонымен қатар, акция барысында үш рет рейд ұйымдастырылып, нәтижесінде 48 әкімшілік құқықбұзушылық анықталған. Түнгі мезгілде жалғыз жүрген бір жасөспірім бөлімшеге жеткізіліпті. Теміржолды белгіленбеген жерден кесіп өткен бірнеше балақайдың ата-аналарына әкімшілік іс толтырылып, айып тағылған.
– Бастысы, акция аясында құқық бұзған жасөспірімдермен, олардың ата-аналарымен түсіндіру жұмыстары жүргізілді. Теміржол – қауіпті аймақ. Өскелең буынның осыны терең түсінгенін қалаймыз. Жауапкершілік баршаға бірдей, Ал, заң талаптарын білмеу – жауапкершіліктен босатпайды, – дейді бұл орайда Семей станциясындағы ЖПБ әкімшілік полиция бөлімінің бастығы Рүстем Әбеуов.
Осындай алдын алу, ақпараттандыру шараларының нәтижесі болса керек, соңғы уақыттарда бөлімше көлемінде балалар мен жасөспірімдердің қатысуымен орын алатын келеңсіз жайттар сиреген.