Техникалық вагоннан өрт шықты
«Қазақстан теміржолшысы» газетінің тілшісі
21 қыркүйекте «Алматы-Петропавл» бағытындағы №105/106 жолаушылар пойызының техникалық вагонынан өрт шықты. Құрамның соңында тіркелген техникалық вагондағы өрт Қарағанды – Астана учаскесінің Мырза – Шоқай аралығына келгенде тұтанған.
Жолаушылар пойызы дереу тоқтатылып, пойыз бригадасының нұсқаулыққа сай сауатты да тез қимыл-қозғалысы нәтижесінде зардап шеккендер жоқ, ал тілсіз жаудан келген материалдық шығынды оқиғаға байланысты тексеріс жүргізіп жатқан «ҚТЖ» ҰК» АҚ комиссиясы анықтайтын болады.
Пойыз бригадасы лауазымдық нұсқаулықтарына сәйкес, қауіпсіздікті қамтамасыз ету мақсатында соңғы бес вагоннан 50 жолаушыны сыртқа шығарып, құрамның бас жағындағы вагондарға көшірді. Оқиға орнына Қарағанды станциясынан өрт сөндіру пойызы келіп, тілсіз жауды ауыздықтады.
Құрамдағы барлық жолаушылар, яғни 184 адам «Алматы – Нұр-Сұлтан-Нұрлы жол» бағытындағы №3/4 Тальго пойызына қайта отырғызылып, Астанаға жеткізілді. Артынан жолаушылар межелі станцияларына жеткізілді. «Астана-Петропавл» қатынасындағы №901 қосымша стандартты пойызымен жөнелтілген №105 Тальго пойызының жолаушыларына билетінің жалпы сомасы ішінара қайтарылатын болады.