Жүк станциясында сақтық шаралары басты назарда
Ақтөбе облысы бойынша меншікті тілші
«ҚТЖ-Жүк тасымалы» ЖШС «Батыс» филиалына қарасты Жіңішке станциясы жүк тасымалына арналған. Шет мемлекеттермен жүк тасымалы қызметін ұйымдастырып отырған станцияда қауіпсіздік басты орында.
Себебі, өңірдегі алпауыт компаниялармен байланыс жасап отырған 67 кірме жол бар және бәрі де жұмыс істеп тұр. Осыдан-ақ өндірісі қайнаған станциядағы жағдай күрделі екенін байқауға болады. АҚШ, Жапония, Оңтүстік Корея, Франция, Германия, Қытай, Ресей елдеріне жүк жөнелтіп отырған бірінші класты станция маңында елді мекендер тығыз орналасқан.
Жуырда станцияда сақтық шараларына қатысты дөңгелек үстел өтті. Жыл басынан бері қауіпсіздікке байланысты 1880 әкімшілік құқықбұзушылық тіркелген. 57 рет жылжымалы құрамның шұғыл тежеуі орын алған. 19 жағдайда жол бойына кенеттен адам шығуымен байланысты болса, 37 жағдайда мал шығу деректері себеп болған.
«Қазіргі таңда теміржолшылар мен тәртіп сақшылары теміржолға жақын орналасқан елді мекендерді аралап, тұрғындармен түсінік жұмыстарын жүргізіп, буклеттер таратуда. Әсіресе қауіп-қатері басым Тұрғындар қалашығы, Химик және Махамбет аудандарында жолды кесіп өткенде өте сақ болуға шақырады», – дейді Жіңішке станциясы техникалық бөлімінің басшысы Анар Мұқанова.