34 мың адам жауапкершілікке тартылды
Ақтөбе облысы бойынша меншікті тілші
Елімізде жыл басынан бері темір жолды белгіленбеген жерден кесіп өтіп тәртіп бұзған 34 мыңнан аса азамат әкімшілік жауапкершілікке тартылған. Жылжымалы құрамды шұғыл тежеудің 1618 фактісі тіркелген, деп хабарлайды Rail-news.kz.
Оның ішінде 308 жағдай теміржолға адамның, ал 1140 жағдай малдың шығуына байланысты тіркелген. Нәтижесінде 1066 тұлға әкімшілік жауапкершілікке тартылған. Көліктегі полиция департаментінің мәліметінше, 9 айда еліміз бойынша 72 адамды пойыз қаққан, олардың жартысынан көбі көз жұмған. Соның ішінде 10 факт бойынша балалар зардап шегіп, 8 бүлдіршін қайтыс болды...
Көліктегі полиция департаментінің бастығы Оңал Бекеевтің айтуынша, жазатайым оқиғалардың негізгі себептері – азаматтардың белгіленбеген жерлерде темір жолды кесіп өтуі. Әлі күнге дейін адамдар теміржолдың қаншалықты қауіпті аймақ екендігін, оның зардаптарын жете түсінбейді. Қарапайым ережені сақтауға ерінетіндер көп.
Әсіресе, адамдар көп зардап шегетін аймақтарға мыналар жатады екен: Алматы-1 – 11, Шымкент – 7, Ақтөбе – 6 және Қарағанды – Сұрыптау және Тараз станцияларында 5 факт тіркелген.
Көлік полициясы азаматтарға теміржолда мұқият болу керектігін күнделікті ескертіп, әлеуметтік желілерде түрлі ақпараттар таратып, қорқынышты мәліметтерді де жария етіп жатыр. Бірақ, әлеуметтің салдыр-салақтығы мен бейғамдығы қайғылы оқиғалар қатарын азайтар емес.