Кемшіліктерді жою үшін арнайы іс-шаралар жоспары жасақталды
Маңғыстау облысы бойынша меншікті тілші
Маңғыстау темір жолында күзгі байқаудың нәтижесі жарияланды. Бүгінде олқылықтардың орны толтырылып, кемшін тұстар жөнге келтірілуде.
Байқау қорытындысы бойынша өткен жиын барысында кем-кетіктің бәрі егжей-тегжейлі зерттеліп, себеп-салдары анықталды. Нақты айтсақ, биылғы байқау барысында комиссия мүшелерінің назарына 900-ге жуық кемшілік іліккен. Олар – түрлі мекемелер мен нысандарға қатысты әртүрлі деңгейдегі бұзушылықтар. Бүгінде олардың бәрі дерлік жойылып, ретке келтірілді. Әрине, бұл аталған кемшіліктер мен олқылықтарды жіберген адамдар да жауаптан тыс қалған жоқ. Жіберген қателік үшін жауап беруге тура келеді.
– Күзгі байқауға байланысты өткен тексерісте анықталған кемшіліктерді жою үшін арнайы іс-шаралар жоспары жасақталды. Қазір сол жоспарға сәйкес жұмыстар жүріп жатыр. Қызметтік міндетін сапалы атқармаған, өз кәсібіне немқұрайлы қараған қызметкерлерге қатысты тәртіптік шаралар қабылданды. Мекеме басшыларына тіркелген кемшіліктер бойынша нақты тапсырмалар беріліп, орындау мерзімі бекітілді, – дейді Маңғыстау қосалқы бөлімінің өндірістік техникалық бөлім инженері Асқат Шарапатдинов.
Жалпы, бесінші қыркүйек пен жетінші қазан аралығындағы өткен комиссиялық байқауда түбек темір жолы бойынша барлық станция мен бекеттер, ғимараттар мен жолдар кең көлемде тексеруден өткен.