Маңғыстауда биыл 160 шақырым жол бойына қоршау тартылды
Маңғыстау облысы бойынша меншікті тілші
Биыл Маңғыстау магистральдық желі бөлімшесі бойынша 160 шақырым жол бойына мал кірмес үшін қоршау салынып, тағы 20 шақырымы жөндеуден өткізілген.
Соңғы жылдары жолға шыққан төрт түліктің пойыздың астына түсіп қалу оқиғасы жиілеп кеткен түбекте бұл игілікті іс болып отыр. Былтырғы жылы жолдағы мал кесірінен 11 айда машинистер 282 рет оқыс тежеу беріп, 38 жағдайда мал басылған. Пойыздың уақытынан кешігуі, тепловоздарға келетін зақым, қауіпсіздікке төнетін қатерден бөлек 14 тоннадан астам жағармай желге ұшқан. Биыл мал басылу фактісі біршама азайған. Жалпы Маңғыстау магистральдық желі бөлімшесі шеңберінде қарастырсақ, 11 айда 34 мал пойызға басылған. Тек Маңғыстау дистанциясы бойынша 171 шұғыл тежеу беріліп, салдарынан 8,55 тонна дизель отыны ысырап болған. Ал мал басудың 25 жағдайы тіркелген. 20 дерек бойынша мал иесі табылып, оларға ҚР Әкімшілік құқықбұзушылық туралы Кодексінің 30-тарау 559-бабы 1-бөлігіне сәйкес ескерту мен айыппұл салынған. Қалған бес малдың иесі белгісіз күйде қалып отыр. Өкінішке орай, қоршауды да бұзып кететіндер аз емес екен.
– Жолға мал шығу №12-13, 11-12, 15-16 бекеттерінде, Ақбөбек – Бопай, Шетпе – №13,14 бекеттер, Жетібай – Өзен, Бестөркүл – Болашақ, Боржақты – Қарақия, Ақбөбек – Бастау, Бекет «Р» – Боржақты, №16 – Тамақ, 11-10 бекеттер аралығында көп кездеседі. Осы уақыт ішінде мыңнан астам мал иелерімен түсінік жұмысын жүргіздік. Желілік полиция бөлімшесі және ауыл әкімшілігі қызметкерлерімен бірлесе Шетпе, Аусары, Қосбұлақ, бекет «Р» – Боржақты аралығы, Жармыш, Қызылтөбе, Батыр, Баянды ауыл тұрғындарына теміржол бойына мал жаймау туралы профилактикалық жұмыстар атқарылды. Маңғыстау, Қарақия және Мұнайлы ауданы әкімдеріне 15 рет хат жолданды. Мал өтпейтін қоршау салу биылғы жылы №14-15 бекеттері мен Шетпе-13 бекеті аралығындағы 70 шақырымға жоспарланған. Қазіргі кезде жер қазатын техникамен қоршаудың бағанасын орнатуға шұңқыр қазылып болып, оған ескі ағаш шпалдан бағаналар орнатылып, тікенек сымдар тартылуда, тек қоршауды да бұзатындар кедергі келтірмесе... – дейді Маңғыстау жол дистанциясының жетекші жол инженері Ержан Артықбаев.