Қауіпті ақауды дер кезінде анықтады
![](https://rail-news.kz/uploads/2024/04/08/KNi7UF9Cv0b1IqAZx1dxQg3QKmZ2xmCAkWXg0qDS.jpg)
![](https://rail-news.kz/img/noimg.png)
Түркістан облысы бойынша меншікті тілші
Жуырда Арыс вагон пайдалану депосына қарасты Түркістан станциясындағы вагондарға техникалық қызмет көрсету қосынының вагон қараушысы Сұлтан Қошқарбаев вагон доңғалағынан қауіпті ақау тапты.
– Станцияға келген №2804 жүк пойызын техникалық қарау барысында жылжымалы құрамдағы 29-шы вагон доңғалағында ақау барын байқадым. Түнгі мезгіл болғандықтан, қолшаммен мұқият зер салғанымда ұршықты осьтің басындағы бекітпенің босағанын байқадым. Дереу вагон операторына хабар беріп, оны жылжымалы құрамнан ағыттық, – дейді вагон қараушы Сұлтан Божбанбайұлы.
Ал вагондарға техникалық қызмет көрсету бөлімінің бастығы Әшірбай Тұрғановтың айтуынша, ақау анықталған сәтте-ақ вагонға жөндеу жұмыстары жүргізілген.
– Мамандардың қайта зерделеуінің нәтижесінде, жүк тиелген №95790044 платформасының оң жақ қапталындағы үшінші доңғалақ жұбының буксы 33 миллиметр сыртқа қарай қозғалғаны расталды. Егер ақау дер кезінде анықталмағанда, жылжымалы құрам ұзаққа бармай апатқа ұшырауы әбден мүмкін еді, – дейді ол.
Айта кетейік, қазіргі кезде қырағылық танытқан қызметкерді марапаттап, мәртебесін көтеру үшін жоғары басшылыққа ұсыныс жасалған.