Манкент станциясы Дүниежүзілік еңбекті қорғау күнін атап өтті

Түркістан облысындағы Манкент станциясында Дүниежүзілік еңбек қорғау күніне орай ұйымдастырылған шаралар легі апта емес, айға ұласты. Станция бастығы Қуаныш Тебеевтің түсіндіруінше, мұндағы теміржолшылар қауіпсіздік талаптарын сақтауды тазалыққа ден қоюдан бастаған.

Яғни сәуір айының басында-ақ арнайы сенбілікті тұрақты түрде ұйымдастырып, оған 10-12 жұмысшы жұмылдырылған. Сөйтіп станция аумағы мен теміржол өткелдерінің маңынан 60 қаптан астам қоқыс шығарылған. Сондай-ақ атаулы күнге арнайы дайындық жұмыстары аясында тауар кеңсесі мен станция кезекшісінің бекеті, пойыз құрастырушылардың бөлмесі сынды тұрмыстық және әкімшілік ғимараттарға да ағымдағы жөндеу жүргізілген.

– Бір айға жоспарланған жұмысты қолға алмай тұрып, алдымен 5 станция кезекшісі мен 5 пойыз құрастырушыға, 9 жүк қабылдап-тапсырушы мен 2 тауар кассиріне еңбек қорғау мен қауіпсіздікті сақтауға қатысты нұсқаулықтар мұқият таныстырылды. Оған қоса «қызметтік міндеттеме», «биіктіктегі жұмыс», «сенбіліктегі жұмыс» деп аталатын арнайы санатпен мекеменің барлық қызметкеріне қауіпсіздікке қатысты түсіндіру жұмыстары жүргізілді, – дейді станция бастығы Қуаныш Наурызбайұлы.

Осылайша сәуір айының басында қолға алынған жоспарлы жұмыс нәтижесінде, станция қызметкерлерінің өз күшімен 16 ескерту, хабарландыру тақтасы кісі қарасы көп жүретін жерлер мен станция маңындағы өткелдерге ілінген. Келеңсіз жағдай мен адам өмірі және денсаулығына қауіп төндіретін сәттерден сақтандыру мақсатында «вагон астынан өтуге тыйым салынады», «белгіленбеген жерден өтуге болмайды», «платформаға жақын тұру – адам өміріне қауіпті», «станция маңындағы желіге жақындауға тыйым салынады» деген сияқты ескерту парақшалар да жергілікті тұрғындар мен жаяу жүргіншілерге таратылған.

Сонымен қатар айлық шара аясында теміржолға жақын орналасқан 18 үйге манкенттік теміржолшылар арнайы барып, қауіпсіздік ережелеріне қатысты және тазалықты сақтау бойынша түсіндіру жұмыстарын жүргізген.