Қызылорда жүк тасымалында күзгі комиссиялық тексеру жүріп жатыр (Фото)

Қызылорда жүк тасымалы және магистральдық желі бөлімшесі басшыларынан құралған топ аймақ бойынша күзгі комиссиялық тексеруге шықты.

Қызылорда ЖТ бөлімшесінің директоры Батырхан Базарбаев пен Қызылорда магистральдық желі бөлімшесінің бастығы Ербол Сәулебеков бастаған комиссиялық топ құрамына «Қазкөліккәсіп» ҚБ төрағасы, салалық мекемелердің басшылары мен бөлім жетекшілері қатысып, барлық нысан иненің көзінен жіп өткізгендей тәсілмен тексерілді.  

Тексеруді бөлімшенің оңтүстігіндегі Шорнақ станциясынан бастаған комиссия мүшелері барлық бекет пен станцияға аялдап, әрбір нысанды жекелей назардан өткізді. Аймақтың солтүстігіне Сексеуіл станциясына дейін тексеру жұмыстарын жалғастырған топ барлық жағдайды жіпке тізіп, белгілеп отырды. Тиісті жерінде ескерту жасалса, кей бекеттерде олқылықтарды тез арада орнына келтіру шаралары жасалды. Аймақ теміржолшылары күзгі тексеруге алдын ала дайындық жұмыстарын жүргізгенімен, барлық жұмыс техникаға тығыз байланысты, пойыздардың қозғалыс қауіпсіздігімен астасып жататындықтан кем-кетік те болмай қалмады. Байқау нәтижелері бойынша өтетін жиында олқылықтар мен кемшіліктерді сараптау жұмысының қорытындысы жарияланатын болады.  

– 2024 жылғы 25 наурыздағы N326-ЦЗ бұйрығымен бекітілген «ҚТЖ» ҰК» АҚ және оның еншілес ұйымдарының құрылымдық бөлімшелерінің қысқы кезеңге дайындығын және жұмысын ұйымдастыру, инфрақұрылымның ағымдағы жай-күйін анықтау мақсатында көктемгі және күзгі тексерулер жүргізу, жылжымалы құрамды, өндірістік-техникалық құралдарды, қозғалыс қауіпсіздігін, өрт қауіпсіздігін, еңбек қауіпсіздігі және еңбекті қорғауды, сондай-ақ ЖТ шаруашылықтарының 2024- 2025 жылдарда қысқы кезеңдегі жұмысқа дайындығын айқындау бұйрығына байланысты өтіп жатқан байқау аясындағы тексеру жұмыстары қыс шанасын жаз сайлайтын теміржолшылар үшін қалыпты ахуал болып табылады. Жоғарыда аталған бұйрық негізінде бөлімше бастығы Батырхан Базарбаевтың биылғы 6 қыркүйекте 63/ НОДГП-10 бұйрығы жарияланды. Осы бұйрықтарға сәйкес компанияның стандартты талаптарын орындау арқылы аймақта теміржол көлігінің тұрақты жұмысы мен пойыздардың қозғалыс қауіпсіздігін сақтау, нысандарды пайдалануда, инфрақұрылымын қолдануда нормадан ауытқуларды уақытылы жою және саланың қыс маусымындағы мінсіз жұмысын қамтамасыз ету мақсатында Шорнақ – Сексеуіл – Қоскөл станциялары арасында орналасқан бөлімшеге қарасты салалық мекемелердің барлығын комиссия мүшелері түгел тексеріп шықты. Тексеру барысында өрескел қателік, кемшілік болмағанмен, ПДБ талаптарының бұзылуы, яғни Шиелі теміржол вокзалы, Сексеуіл локомотив пайдалану депосы және Сексеуіл – Қоскөл жаңа теліміндегі 19-бекет теміржолшыларының талапқа сай келмейтін әрекеттері байқалып, ескерту жасалды, бірқатар кемшіліктер дереу жойылды, – деді комиссия мүшесі Қызылорда ЖТ бөлімшесінің қауіпсіздік және еңбек қорғау, экология бөлімінің бастығы Ғалия Көпжасарова.