Ақтөбе аумағында биыл локомотив бригадалары 56 рет шұғыл тежеу берген
Ақтөбе облысы бойынша меншікті тілші
«ҚТЖ» ҰК» АҚ Қозғалыс қауіпсіздігі департаментінің Ақтөбе учаскесі бойынша бас ревизоры Еркінбек Елғондының басшылығымен өткен жиында биылғы жылдың 10 айының жұмысы қорытындыланып, бірқатар мәліметтер жария болды.
Мәселен, биылғы он айда Ақтөбе теміржолының аумағында локомотив бригадалары 56 рет шұғыл тежеу берген. Оның 18-і – жолаушылар пойызы. 35 жағдайда соқтығысу орын алып, әрине шығынсыз болмады. Жылжымалы құрамдар белгіленбеген жерден өткен 7 адамды соғып, 5 жағдай адам өлімімен аяқталған.
Ақтөбе учаскесінің бас ревизоры аймақтағы қозғалыс қауіпсіздігіне жауапты басшыларды жинап, теміржол көлігінің ақаусыз жұмысына әсер ететін жағымсыз факторларға тоқталды. Өкінішке қарай, жүргізіліп отырған профилактикалық шараларға қарамастан, қараусыз жайылған мал, автокөлік құралдары жүргізушілерінің теміржол өткелдерін кесіп өту ережелерін бұзуы, адамдардың жолды кесіп өтуі сынды келеңсіз жайттардың азаймай отырғанын мәлімдеді.
Сонымен қатар адамдардың темір жолға бөгде заттарды тастауы, теміржол мүлкін ұрлау, дала өрттері секілді теміржолшылар күнделікті күресіп жүрген мәселе де қозғалыс қауіпсізідігне нұқсан келтіріп отырған факторлар екені айтылды.
Биыл 10 айда аймақта жылжымалы құрам белгіленбеген жерден өткен 7 адамды қағып кетіп, 5 адам қаза болған. Оның бірі маусым айында «Ақтөбе-1-Жіңішке» аралығында болды. Темір жолды белгіленбеген жерден өтем деген 17 жастағы қыз бала ауруханада қайтыс болды.
«Мұндай қайғылы жағдайлар сабақ болу керек. Бірақ жыл сайын қайталанып отырған қайғылы оқиғалар жергілікті тұрғындардың қауіп-қатерді ескерту, алдын алу, түсіндіру жұмыстарына жеткілікті көңіл бөлмей отырғанын көрсетеді. Сондықтан біз өз тарапымыздан қауіпсіздік шараларын күшейте түсуіміз қажет», – деді Еркінбек Елғонды.
Аймақ теміржолшылары жыл сайын тікенді сым мен ескі шпалдарын қолдана отырып 80-100 шақырымға дейін көлемде жол бойына мал өтпейтін қоршау салады, қайта жөндейді. Биыл теміржолға жақын елді мекендердегі 7 мыңнан астам адамға мал жаю тәртібін түсіндірген. Автокөлік жүргізушілері де қозғалысқа кедергі келтіруін доғармай отыр. Локомотив машинистері әрдайым қозғалыста болғандықтан автокөлікпен соқтығысудың алдын ала алмайды.
Қауіпсіздік басты тақырыпқа айналған жиында осы және тағы басқа мәселелер сөз болып, жоғарыда айтылған келеңсіз жайттардың алдын алуға бағытталған бірқатар ұсыныстар берілді.