Наурыз тойында станция қызметкерлері мен ардагерлер бас қосты

Биыл түбек теміржолында Наурыз нақыштары ерекше көрініс тапты. Мереке әр ұжымда түрлі деңгейде атап өтілді. Теміржолшылар бір-біріне қонаққа барып, ұмытылып бара жатқан ұлттық дәстүрлерді жаңғыртып, неше күн тойлатты.  

Тігілген ағаш үйлердің сәні мен дастархандағы дәміне, ұлттық үлгіде киінген қыз-жігіттердің көркіне көз тойып, адамдардың жүзіндегі қуаныш пен ұжымдағы бірліктің, бәріне көңіл марқайды. Татулықтың, қонақжайлықтың  үлгісі паш етілген мерекелік бас қосулар осы аптада Маңғыстау қосалқы бөліміне қарасты тоғыз жолдың торабындағы Бейнеу және Түрікменстанмен шекарадағы Болашақ станциясында жалғасты. Маңғыстау магистральдық желі бөлімшесінің ауласында және ондағы  электрмен жабдықтау, жол дистанцияларында да киіз үйлер бой көтеріп, мерекелік кеш болды.

Бейнеудегі Наурыз тойында станция қызметкерлері мен ардагерлері бас қосты. Станцияда еңбек еткен зейнеткерлерге арнайы мерекелік дастархан жайылып, станция бастығы Есет Хайруллиннің басшылығымен болған думанды жиын қос буын теміржолшылардың көңілді кездесуіне айналды.  

Болашақ станциясының ұжымы болса мекеме ғимаратын ұлттық үлгіде безендіріп, ас-тағамдарын әзірлеп, тойлатып, көрісе келген ауылдағы өзге теміржолшыларды зор құрметпен күтті. Қыз-келіншектер дәмді тамақ дайындау, кесте тігу сияқты қөлөнер шеберліктерін көрсетіп жарысты. Ер азаматтар күш сынасты, қолға домбыра алып, ән, күймен отырыстың көрігін қыздырды. Жеңімпаздар диплом, бағалы сыйлықтармен марапатталды.  

Магистральдық желі бөлімшесінің бас ғимаратындағы ақотаудың  алдында қаз-қатар тізілген келіншектер келушілерді иіле сәлем салып, Наурыз  көжемен қарсы алып, дәмді дастарханда қонақ қылды. Мұнда да ер азаматтар ұлттық спорттық ойындардан бақ сынасты, әйелдер қауымы көріністер қойды. Бесікке салу дәстүрі жасалып, осы салада жетістікке жеткен азамат болсын деген ырыммен бөлімше директоры Мұхтар Бақтыгереевке теміржолшы отбасы атұстарының тұсауын кестірді. Одан кейін спорттық ойындарда жеңіске жеткендерге диплом мен сыйлықтар табысталып, салтанатты шара әрі қарай ән мен биге ұласты.   

Бөлімшедегі Маңғыстау жол дистанциясы мен Маңғыстау электрмен жабдықтау дистанцияларындағы Наурыз думаны да осындай салтанатпен жалғасты.