Маңғыстауда жоспарлы жол жөндеу жұмыстары жүргізілуде

Маңғыстау магистральдық желі бөлімшесінде жазғы мерзімге жоспарланған жол жөндеу жұмыстары ақпан айының екінші жартысында бастау алған. Содан бері көп уақыт өтпесе де қазірге дейін белгіленген жылдық меженің біраз бөлігі орындалды. Нақтырақ 5,9 шақырым жол күрделі жөндеуден өтті.

Жалпы бөлімше биыл Сайөтес – №7 бекет аралығында 15,7 шақырым жолды күрделі жөндеуден өткізеді. Сонымен қатар Маңғыстау жол дистанциясында 11, Бейнеу жол дистанциясында 21 жиынтық бағыттамалық бұрманы ауыстыруды жоспарлаған. Осыған дейін соның үштен бірінде белгіленген жұмыстар жүзеге асқан немесе барлығы 11 жиынтық бұрма ауыстырылған.  

Жол қауіпсіздігін қамтамасыз ету, сапасын жақсарту бағытындағы басқа да жұмыстардың ретімен таныстырған бөлімшенің жол бөлімі басшысы Нұрлыбай Қисаевтың айтуынша, осы жылы бөлімшеге қарасты жолдарға күшейтілген орташа жөндеу жұмыстары да жүргізілмек. Станция жолдарына қатысты аталған жоспар Бейнеу жол дистанциясы бойынша 9,7 шақырымды құрайды екен. Бүгінге дейін соның 5,4 шақырымы күшейтілген орташа жөндеуден өткізілген.  

– Маңғыстау магистральдық желі бөлімшесі бойынша жол жөндеу жұмыстары межеленген жоспар аясында іске асырылып жатыр. Жоғарыда атағанымыздай, күрделі жөндеу жұмыстарына жылдың екінші айында кірістік. Бұл жұмыстарға Ақадыр машиналандырылған жол дистанциясының арнайы техникалары мен мамандары жұмылдырылған. Бұдан басқа биыл біраз жерге малға қарсы қоршау салуды ойлап отырмыз. Қазірге дейін жоспардағы 107 шақырымнан 4 шақырым жол қоршалды. Өйткені аталған жұмыстар енді ғана, сәуір айында басталып жатыр. Жыл аяғына дейін ПЧ-12 Бейнеу дистанциясында – 54 шақырым, ПЧ-13 Манғыстау дистанциясында 53 шақырым жолға мал кіре алмайтын қоршау салатын боламыз. 450 шақырым малға қарсы қоршауды ағымдағы жөндеуден өткіземіз. Жөндеу жоспарындағы 75 шақырымы жүзеге асты. Жұмыс әрі қарай жалғаса береді, – дейді жол бөлімі басшысы.  

Еске сала кетсек, түбектің магистральдық желі бөлімшесінде өткен жылы қырық шақырымға жуық жол жөнделген еді. 17 жиынтық бағыттамалық бұрма ауыстырылып, станциялық жолдардың 2,645 шақырымы темірбетонды шпалдармен нығайтылса, жолға мал шығуының алдын алу бағытында 145,5 шақырым жерге қоршау салған болатын.