Балаларға базарлық

Маңғыстау жүк тасымалы бөлімшесі мен кәсіподақ ұйымы бірлесіп арысы Бейнеу, Болашақ, берісі Ақтау, Құрық аралығындағы станция-бекеттердегі жұмысшылардың балаларына тамаша мереке ұйымдастырды.

Облыс орталығындағы Ақтау ойын-сауық орталығында тәттілер таратылып, кинотеатрда фильм тамашалау мүмкіндігі берілді. Бейнеу станциясы мен оған жақын басқа да бекет-станциядағы балақайларға екі күндік іс-шара жоспары жасалды. Бірінші топ «Сәлем кидс» орталығындағы ойын-сауықтың куәсі болса, екінші тобы төртінші маусымдағы мерекелік кешке шақырылды. Болашақ станциясындағы бүлдіршіндер аула клубына жиылып, уақытын мазмұнды өткізді. Онда топтық жарыстарға қатысып, ән айтып, би билеп, сыйлықтарға ие болды. Кәсіподақ ұйымы Шетпеде де балаларға көңілді кештің билеттерін тарту етті. Шетпе, Сайөтес станциялары мен №10, 11, 12 бекеттердегі балақайларға арнап ойын-сауық орталығында аниматорлар мен ойындар, фуршет пен мерекелік бағдарламаны өткізуге қаржы бөлді. Жаңаөзендік балғындарға базарлық қаладағы балалар паркінде жалғасты. Онда балалар қалағанша ойнап, сайыстарға қатысып, тәттілер мен ойыншықтар алды.  

Маңғыстау жүк тасымалы бөлімшесі кәсіподақ ұйымының төрағасы Әзірбай Тұрмағанбетовтің айтуынша, биыл бөлімшенің кәсіподағы шалғайдағы станция балаларын көбірек қамтыған. Вагон және локомотив деполарының іс-шарасы бөлек. Локомотившілер Мұнайлы аудандық ерекше балалардың мерекелік кешіне демеушілік жасап, сыйлықтар алып берген. Деполықтар балаларына аниматорлар қатысқан ертегілік кеш сыйлаған.