Вокзалдар сенімгерлік басқаруға берілмек
Маңғыстау облысы бойынша меншікті тілші
Биыл еліміздегі теміржол вокзалдары жаппай жаңарып-жаңғыруда. Соның қатарында Маңғыстау өңірінде де үш вокзалға реконструкция жасалатынын хабарлаған болатынбыз.
Жақында облыс әкімдігінде өткен басқосуда түбектегі жаңғыртылатын вокзалдар сенімгерлік басқаруға берілетіні белгілі болды. Облыс әкімі Нұрдәулет Қилыбайдың төрағалығымен өткен осы жиын барысында Маңғыстау, Бейнеу және Шетпе вокзалдарын «Қазақстан темір жолы» ұлттық компаниясына сенімгерлік басқаруға беру мәселесі талқыланған.
Маңғыстау вокзалында реконструкциялау жұмысы осы жылғы 14 сәуірден бастау алып, алдымен ескі вокзал ғимаратын сүру жұмыстары қолға алынған еді. Қазірге дейін құрылыстың 10 пайызы орындалған. Демонтаж кезеңі де аяқталуға таяу. Бұл вокзалдың ғимаратын сенімгерлік басқаруға беру жөнінде облыс әкімдігінің қаулысы шығып та қойған. Шетпе және Бейнеу вокзалдары әліге дейін аудандық жергілікті биліктің, нақтысы аудандық коммуналдық меншікте. Сондықтан облыс әкімі оларды да сенімгерлік басқаруға беру жұмысын жеделдетуді тапсырды.
Вокзалдарды жаңғырту жобасы бойынша бұл нысандар енді бірнеше есеге дейін үлкейтілмек. Шетпе вокзалының ауданы бес, ал Бейнеу мен Маңғыстау вокзалының аумағы он есеге артады деп жоспарланған.