Қазалыда кешенді комиссиялық байқау ұйымдастырылды
Қызылорда облысы бойынша меншікті тілші
Қызылорда өңіріндегі Қазалы станциясында желілік құрылымдардың басын қосқан оқу-көрсетілімдік байқау өтті. Оған аймақтағы барлық мекемелердің басшылық құрамы мен жауапты мамандары қатысты.
Қызылорда магистральдық желі бөлімшесінің директоры Ербол Саулебеков жетекшілік еткен айлық комиссиялық байқауда Қазалы станциясының жол шаруашылығы, сигнализация және байланыс жүйелері, жүк және коммерциялық сала, қозғалыс қауіпсіздігінің жайкүйі т.т. теміржол саласының түрлі бағыттарын қамтитын кешенді тексеру жұмыстары жүргізілді. Станция бастығының орынбасары Руслан Мақашев ДУ-46 айлық тексеріс нәтижесінің толтырылуын көрсетіп, өз тәжірибелерімен бөлісті.
Қазалы станциясы – аймақтағы маңызды тораптық станциялардың бірі. Мұнда тәуліктік пойыз қозғалысы мен жүк тасымалы үздіксіз жүретіндіктен станцияның өткізу қабілеті жоғары деңгейде сақталады. Осы бағыттағы жұмыстарды сапалы ұйымдастыру – теміржолшылардың кәсібилігіне тікелей байланысты.
Оқу-көрсетілімдік байқау болған соң әрине, тексеріс барысында жиналғандар өзара тәжірибе алмасып, штаттық және төтенше жағдайларда әрекет ету тәсілдерін пысықтады. Жол мастері, кезекші оператор, пойыз қабылдап-жөнелтуші және вагон қараушыларға дейін түгел қамтылған комиссиялық байқау сала мамандарының кәсіби білімдерін жетілдіріп, шеберліктерін шыңдаудың тағы бір мүмкіндігі болғаны анық.
Комиссия мүшелерінің пайымдауынша, көрсетілімдік байқауға таңдалынып отырған Қазалы станциясының жоғары еңбек өнімділігі ең алдымен ұжымының ұйымшылдығы мен темірдей тәртіпті ту еткен жауапкершілігінде. Олар аталған тексерістің жұмыс тәжірибесін жетілдіруге, нұсқаулық талаптарын нақты түсінуге және қауіпсіздік шараларын терең меңгеруге ықпал еткенін жеткізді.
Комиссия мүшелері жол шаруашылығы, байланыс, белгі беру және электрмен жабдықтау саласында көп кездесетін кемшіліктер туралы көрсетіп, өз тәжірибелерімен бөлісті. Қос бөлімшенің қозғалыс қауіпсіздігі бөлімінің басшысылары Сағатбек Тумырзаев пен Ғани Қадіров қауіпсіздіктің сақтауының бірден бір кепілі – ереже-нұсқаулықтардан айнымай, қатаң сақтап жұмыс істеу екенін еске салды.
– Қозғалыс қауіпсіздігін сақтау – теміржолшының ең басты мақсаты, міндеті, жұмысы. Оны орындау үшін, оны сақтау үшін еш нәрсе кедергі бола алмайды, себебі теміржолшының жұмысы заңдылықтар мен тапсырмаларды орындаумен тығыз байланысты. Бүгінгі оқу-тәжірибелік көрсетілімді комиссиялық айлық тексеру аймақтағы барлық мекеме, станция және бөлім басшыларының қатысуымен, тәжірибе алмасу мақсатында өтіп отыр. 50-ден аса қызметкерлердің қатысуымен өткізілген жиында айлық тексерісті сапалы жүргізу, оның ішінде нормалық нұсқамалардың талаптарын орындау, жол көрсеткіштерін, белгі беру құралдарының дұрыс жұмыс істеуін қамтамасыз ететін қолданыстағы аппараттардың сынақтан сауатты өткізілуін көрсету басты мақсат болды, – дейді НЖС бөлімшесінің қозғалыс қауіпсіздігі бөлімінің басшысы Сағатбек Тумырзаев.
Комиссия станция жұмысының сапасы мен тәртібіне оң баға берді. Мұндай комиссиялық тексерістер апаттың алдын алуға, өндірістік тәртіп пен еңбек қауіпсіздігін арттыруға септігін тигізетін маңызды шара, сондықтан бүгінгі күні тәжірибе алаңына айналған байқау сала қызметкерлері үшін тиімді болғанын жеткізді.
