Теміржолшылардың отбасына алғыс хат табысталды
Қызылорда облысы бойынша меншікті тілші
«...Еңбек қауіпсіздігін сақтай отырып өміріңізді қорғаңыз, еңбек ете жүріп отбасыңызды қорғаңыз, Сіз отбасыңызға керексіз!» деген жүрекке жылы сөздермен басталатын алғыс хат теміржолшыларға жеткізілді.
Теміржолшы – күн сайын сапарға аттанған әр пойыздың қауіпсіздігіне жауап беретін тұлға. Ол – тек теміржол маманы емес, бір отбасының қорғаны, бала-шағаның сүйікті әкесі, ананың үміті, жұбайының сенімі. Осындай салмақты еңбекті арқалаған теміржолшының артында әрдайым мызғымас тірек – оның отбасы тұрады. Осыны терең түсінген компания басшылығы теміржолшылардың отбасына арналған алғыс хат жолдауды ұйғарды.
Қызылорда магистральдық желі бөлімшесінің директоры Ербол Сәулебеков теміржолшылардың отбасын жинап, Магистральдық желі дирекциясының директоры С.Рахметовтің алғыс хатын табыстап, әр теміржолшының отбасы мүшелеріне ілтипат көрсетті, оларға кәсіподақ ұйымы тарапынан естелік сый-сияпаттар табыс етілді.
Кәсіподақ ұйымының төрайымы Салтанат Махмутова: «Теміржол саласында аянбай еңбек етіп жүрген жандарға отбасының, жұбайларының түсінігі мен қолдауы ауадай қажет. «Сақ бол, аман бол, біз сені күтеміз!», «Балалардың қуанышын бірге көрейік, болашақты бірге құрайық!» деген жылы сөз, тілек үйде емес, түзде көп жүретін теміржолшыға үлкен күш пен қолдау беретіні талас тудырмайды», – дейді.