Маңғаз Маңғыстауда
Маңғыстау облысы бойынша меншікті тілші
Әрісі Орталық Азиямен, берісі Болашақ арқылы Түркіменстанмен шектесетін ұлан-байтақ аумақты алып жатқан түбек теміржолының түкпір-түкпірінде неше күн бойы түрлі іс-шараның көрігі қызды.
Магистральдық және жүк тасымалы бөлімшелерінің бас ғимаратында өткен «көрісуден» басталған дүбірлі той желі бойындағы теміржол мекемелерінде жалғасты. Білекті жігіттер боз кілемде күш сынасып, өнерлі аналар шеберлігімен жарысты. Келіндер жағы самаурынын қайнатып, көжесін әзірлеп, қонағына қаймақ қатқан шай құйды. Құрт, ірімшігін дайындап, алты қанат ақ үйде дастарханын жайнатты. Ер азаматтар ләңгі теуіп, асық ойнап, садақ атты, арқан тартты. Жастар жағы алтыбақан аясында сейіл құрып, атқа мініп, қыз қуу ойынына қатысты.
Магистральдық желі бөлімшесі мен Жүк тасымалы бөлімшелерінің атынан Мұнайлы ауданының орталық алаңында үлкен үй тігіліп, келген қонақтар мен сала қызметкерлеріне қонақасы берілді. Бөлімшелердің басшылары, кәсіподақ ұйымдарының төрағалары жиылған жұртшылықты құттықтап, ақжарма тілектерін жеткізді. Мұндай басқосулар Болашақ станциясында да жалғасты. Болашақтық теміржолшылар мерекені әнмен әрлеп, спорттық ойындар арқылы тартымдылығын арттыра түсті.
Бейнеулік теміржолшылар да қалыспады. Ұлттық спорт түрлерінен жарысып, жол дистанциясының ғимаратында үлкен жиын ұйымдастырды. Дистанция тіккен үйді ұлттық үлгідегі бұйымдармен безендіріп, ақ жаулықты аналар ұршық иіріп, жастарға үйретіп, қолдан жасаған дүниелерін көрсетті. Ерлер жағы садақ атып, түрлі ұлттық ойындар ойнап жарысты.