Жамбыл жол бөлімшесі мен №13 Тараз темір жол колледжі «Темір жол кезекшісі» мамандығы бойынша апталық өткізді

Апталықты ұйымдастыру арқылы колледж басшылығы студенттердің өз мамандығына деген қызығушылығы мен жауапкершілігін қалыптастырып, еңбек адамдарын құрметтеу, жұмыс өнімділігін арттыру бағытында тәрбиелеуді көздеді. Апталық аясында колледждің оқу өндірісі шеберлері А.Махамбетова мен Р.Асымбекова студенттерге мамандықтары жайлы қызықты мәліметтер беріп, өткізілген ашық сабақтарда темір жол терминдерінің ағылшын және орыс тілдерінде қалай аталатынын түсіндірді.    

Ал, арнайы пән оқытушысы А.Дәрменбаева қашықтықтан республикалық Түрксіб олимпиадасына 17 студентін қатыстырып, олардың үшеуі 1-орын иеленсе, 12 студенті мақтау қағазына, қалғаны арнайы сертификатқа ие болды.

Сондай-ақ, осы апталық аясында «Егеменді елімнің білікті маманы» атты зияткерлік ойыны өткізіліп, колледж студенттері өздерінің білімі мен таным көкжиегі бойынша бақ сынасты. Және де оқу өндірісінің шеберлері «Колледж түлектері – біздің мақтанышымыз» атты дөңгелек үстел ұйымдастырып, кездесуде Республикалық жастар форумына қатысқан арнайы вагон жолсерігі М.Көшербаева, жүк қабылдаушы Т.Байдәулетов, оператор Л.Мирзаулина, автоматтандырылған басқару жүйесінің операторы С.Кенжеғали сынды түлектер мен студенттер арасында әдемі диалог орнап, болашақ теміржолшылар кеше ғана өз араларынан ұшып шығып, бүгінде өндірісте еңбек етіп жүрген аға-апаларынан пайдалы мағлұматтарға қанығып, кеңестер алды. Айта кетерлігі, жоғарыда аты аталған жас мамандарға Жамбыл жол бөлімшесінің басшылығы қолдау білдіріп, Астана қаласына дуальді оқытуға жіберіп, кейін жұмысқа қабылдаған болатын.

Осылайша, теориялық білімді үнемі тәжірибемен ұштастырып отыруды дұрыс жолға қойған колледж басшылығы осы апталықтың шеңберінде студенттерді колледждің әлеуметтік серіктесі саналатын Жамбыл жол бөлімшесінің мамандарымен таныстырып, өндірісті олардың өз ауыздарынан естіп, көзбен көруіне мүмкіндік жасады.

Жасұлан СЕЙІЛХАНОВ, 

Тараз