Ақтөбелік теміржолшылар 102 жастағы майдангерді Жеңіс күнімен құттықтады
Ғасырдан аса жасаған Ұлы Отан соғысының ардагері, қарт теміржолшы Артем Алек сеевич Қандыағашта тұрады. Ақтөбе магистральдық желі бөлімшесі бастығының бірінші орынбасары Темірғали Көштаев бастаған теміржолшылар 102 жастағы майдангерді Жеңіс күнімен құттықтап барды.
Проскурня Артем Алексеевич 32 жыл Қандыағаш жол дистанциясында еңбек еткен. Ол 1917 жылдың 23 сәуірінде Ақтөбе облысы Ключевой ауданы Ново-Украина ауылында дүниеге келген екен. 1938 жылы әскер қатарына шақырылған. Қария соғысқа ерте аттанған жауынгерлер қатарында. Мәскеуді жаудан қорғаған.
Соғыстың соңына дейін болған. 1945 жылы елге оралып, Қандыағаш қаласындағы жол дистанциясында зейнетке шыққанша еңбек еткен. «Ұлы Отан соғысының II дәрежелі» орденімен, «Германияны жеңгені үшін» және мерекелік медаль дармен марапатталған.
«Сіздер – осыдан 74 жыл бұрын бізге Жеңіс сыйлаған ұрпақсыздар. Адамзат тарихындағы ең сұрапыл, жойқын соғыста жауды жеңген ерліктеріңіз ешқашан ұмтылмайды. Сізге денсаулық, отбасыңызға амандық тілейміз», – деп тілек білдірді қарияға Темірғали Көштаев.
«Рахмет, балалар, мереке сайын осылай бір марқайып қаламын. Сіздердің мені жылда құттықтап келетіндеріңе де ширек ғасыр болыпты. Денсаулықтарың мықты болсын. Бәріңе де алғысым шексіз. Еліміз тыныш, халқымыз аман болсын, соғыс болмасын», – дейді қарт майдангер.
Бүгінде Артем Проскурня 3 қызынан 4 немере, 3 шөбере сүйіп отыр.