Темір жолдан өту ережесін бұзған тұрғындар жауапкершілікке тартылған
Жақында Достық станциясы ұжымының қызметкерлері «Темір жол – аса қауіпті аймақ» тақырыбында станциядағы мектеп оқушыларымен кездесу өткізді.
Станцияның өндірістік оқыту инструкторы Қанат Машарипов бастаған теміржолшылар темір жол бойындағы қауіпсіздікке, ең алдымен, әр адамның өзі жауапты екенін жеткізді.
– Адамның өмірі мен денсаулығы – өзінің қолында. Әр оқушы теміржол ережесін, тәртібін жақсы білу керек. Ережені біліп қана қоймай қатаң сақтау пойыз апатынан сақтайды. Өткелден өтерде сол жерде ілулі тұрған белгіге назар аудару, әсіресе, шлагбаумы жоқ теміржол өткелінен өтерде өте сақ болу қиын ба? Шлагбаумы жоқ теміржол өткелінде паровоздың суреті бейнеленеді. Арнайы жолмен өту керек. Өткелі жоқ жерден өтуге болмайды. Әрқашан жолда жүру ережесін есте сақтап, тәртіп бұзбай жүрсек, қаншама қайғылы оқиғалардың алдын алып, қанша өмірді сақтауға болар еді, – деді Қ.Машарипов балалармен кездесу барысында.
Станция теміржолшылары мұндай кездесулерден бөлек жол бойында рейдтер өткізу барысында жаяу жүргіншілермен де түсіндіру жұмыстарын жүргізеді. Сондай тексерулер барысында таяуда олар жолдан өту ережесін бұзған 25 тұрғынды анықтағандарын жеткізді. Олардың 20-сы әкімшілік жауапкершілікке тартылған. Бес адамға тәртіп сақшылары ауызша ескерту берген.
– Егер тұрғындар темір жол бойында қарапайым ғана қауіпсіздік шараларын орындап, оны әдетке айналдырса, қайғылы оқиғалар болмайды. Темір жолдан өтер алдында маңайына мұқият қарап, пойыздың келе жатқанын не жоқ екендігін анықтап алуы қажет. Пойыз алыста келе жатса да сигнал беріп жүреді. Сондықтан дыбысқа мән берген жөн. Оқыс оқиғаның көбі асығудан болады. Әйтпесе, алыста келе жатқан пойыздың адамды бірден қағып кетуі мүмкін емес қой. Адамдар пойыздың жақындап қалғанын біле тұра, асығып жолдан өтіп кеткісі келеді. Сондықтан, балалар, сендерден өтініп сұраймын, өз өмірлеріңді қатерге тігіп, асығыстық жасамаңдар. Теміржолда мейлінше сақ болыңдар, – деп кеңес берді инспектор оқушыларға.