ҚТЖ қызметкерлері «Донор күніне» орай 36 литрден астам қан тапсырды

Қазанның 27 мен 29 күндері «ҚТЖ» ҰК» АҚ мен ҚР Денсаулық сақтау министрлігі бірлесіп, «Донор күні» акциясын өткізді. Теміржолшылар қарсы көрсетілімдер мен ұсынымдар тізімімен алдын ала таныса отырып, осы қайырымдылық іс-шараға белсенді қатысты. «ҚТЖ» ҰК» АҚ Адами ресурстарды басқару департаментінің бас менеджері Замир Серіковтің айтуынша, бұл акция Тәуелсіздіктің 30 жылдығына арналған «Қайырымды істер марафоны» жалпыұлттық жобасы аясында өтті.

– Бүгін компания қызметкерлері донорлық қозғалысты қолдап, медициналық мекемелердің қажеттіліктеріне қан тапсырды. Акцияға қатысуға ниет білдірушілер қатары өте көп болғандығын ескере отырып, осы аптада іс-шараны екі рет өткіздік, – дейді Замир Серіков.

Акцияның бірінші күнінде 58 теміржолшы қан тапсыруға келіп, соның ішінде 46 адамнан 20,7 литр қан алынды. Норма әр адамға – 400 мл. Бір айта кетерлігі, олардың арасында 5-10 жылдан бері қан тапсыратын тұрақты донорлар көп болып шықты. Олар қан орталықтарында тіркеуде тұрған, донорлық карточкасы бар, қажет кезде жедел көмекке келетін донорлар тізімінде. Донор болудың өзіндік талаптары бар. Қан орталығының дәрігері Елена Викторовнаның айтуынша, олардың қай-қайсысы да денсаулығына ерекше көңіл бөлетін, созылмалы аурулары жоқ, спортпен шұғылданатын азаматтар. Расымен де біз сөзге тартқан, біраз жылдан бері қан өткізіп келе жатқан белсенді донор – «ҚТЖ» ҰК» АҚ Техникалық орталығының бас менеджері Азамат Маңғытаев жұмыстан бос уақытта футбол және баскетбол ойнағанды жақсы көретінін, жүгірумен де айналысатынын айтты.

– Донорлық тек игі іс қана емес, сонымен қатар адамның өз денсаулығына да пайдалы. Біреуге қан беру арқылы ағзада қан жаңаланып тұрады. Оның үстіне сіздің қаныңыз басқа бір адамның өмірін құтқарып қала алады. Мен бүгін қайтадан қан тапсырдым және де өзімді өте жақсы сезініп тұрмын. Қан тапсыруды 5-6 жыл бұрын бастадым. Жыл сайын 2 рет тапсырамын, – дейді ол.

Ұлттық компанияда Көп функционалды қызмет көрсету орталығының кадр бөлімінің маманы Құралай Ысқақованың да донор болып келе жатқанына 8 жыл болған.

– Өзім қатысқан сегіз рет қан тапсыру акциясының ішінде үшеуі – осы біздің «ҚТЖ» компаниясы ұйымдастырған донорлық іс-шара. Қайырымдылық жасау, сауапты іс мақсатында қан тапсырамын. Маған дәрігерлер қанымның сапасы тіпті кішкентай балаларға құюға жарамды екенін айтады, – дейді ол.

Компанияда шаруашылықты басқару департаментінде флорист болып еңбек ететін Наталья Мифтахова да 4 жылдан бері жылына екі реттен қан тапсыруды әдетке айналдырған.

– Менің қан тобым өте сирек кездесетін 4-топқа жатады. Жасым – алпыста, бірақ денсаулығым өте жақсы. Спортпен шұғылданамын, бойымда созылмалы аурулар жоқ. Пандемия басталғалы қан тапсырмағасын, қаным қоюланып кеткендей болып жүр едім. Сондықтан, мұндай акциялар қайта жалғасын тапты, өте қуаныштымын, – дейді донор теміржолшы.

Акцияның екінші күнінде қан тапсыруға 44 теміржолшы келіп, соның ішінде 35 адамнан 15,750 литр қан алынған. Жалпы екі күнде 36,5 литр қан жиналыпты. Медицина қызметкерлері қан тапсыру қайырымдылықтың маңызды және қолжетімді түрі екенін еске салады. Донорлар қанының арқасында дәрігерлер миллиондаған қазақстандықтардың өмірін сақтап қалады. Донор болу үшін қызметкерлерге мұндай акциялардың өткізілуін күтудің қажеті жоқ, Қазақстанның қан қызметіндегі жетекші ұйымға – елордадағы Трансфузиология ғылыми-өндірістік орталығына тікелей жүгінуіне болады.