Ғасырға жуық жасаған астаналық ардагер 77-ші жеңіс күнін көргелі отыр

Ғасырға жуық жасаған Ұлы Отан соғысының санаулы ардагерлерінің бірі, елорда тұрғыны Жүнісбек Кәрімовтің есімі көпке таныс. Он сегіз жасында туған жері Ақмола облысының Қажымұқан ауылынан соғысқа аттанған ол – Берлинге дейін барған жеңіс жауынгері.

Биыл 96 жасқа келген ардагер 1944 жылы Қызыл Армия қатарына шақырылып, үш айдай Алматыда соғысқа дай- ындықтан өткен соң майданға аттанып, кескілескен ұрысқа кіріп кете барады. 1945 жылы Берлин түбіндегі жан алып, жан беріскен қан майданға қатысып, кеңес әскері құрамында қалаға алғашқылар қатарында кіреді. «Қырық жыл қырғын болса да, ажалды өледі» деген рас сөз, менің маңдайыма жаратқан осынша қатал тағдырды жазса да, соның бәріне шыдауға төзім мен ұзақ ғұмыр беріпті. Кешегі сұрапыл соғыста жараланған кезде де аман қалып, осынша ғұмыр сүремін деп ойламадым. Келер ұрпақ мұндай соғысты көрмесін деп тілегімізді айтып жүреміз. Еліміздің жастары, бүгінгі ұрпақ сол соғыста көз жұмған батыр бабаларын ұмытпауы керек, себебі бұл – тарих, әрі халқымыздың Отан алдындағы адалдығы мен патриоттығы үлгі болуға тиіс» дейді Жүнісбек ата. 

Ардагер соғыстағы ерлігі үшін 1, 2 дәрежелі «Отан соғысы» орденімен, «Маршал Жуков» және «Ерлігі үшін», т.б басқа да көптеген мерейтойлық медальдармен марпатталған. 

Соғыстан кейін авиациялық училищеге оқуға түсіп, Белоруссиядағы ұшақ жөндейтін зауытта инженер-электрші болып жұмыс істейді. Ардагерге тек 1951 жылы елге оралуға рұқсат етіледі. Ақмолаға келген соң 40 жылдан астам уақыт теміржол саласында еңбек етеді. Бүгінде елордада тұратын қария жасы ғасырға таяса да тың, сергек ойлы, газет-журнал оқиды. Бір- неше жыл бұрын жарты ғасыр серігі болған өмірлік қосағы дүниеден өткені қартты күйретіп кеткені рас, жалғыздығы жанына батса да тағдырына налыған емес, келер ұрпаққа ғибрат айтып, батасын беріп ғұмыр кешуде.