Қызылордалық теміржолшылар Қостанайға жылу жинады
Қызылорда облысы бойынша меншікті тілші
Қостанай аймағында орын алған алапат өрт сыр елінің теміржолшыларын да бей-жай қалдырмады. Олар тілсіз жаумен күрескен өңір тұрғындарына қайырымдылық көмек жіберуге кірісті.
«ҚТЖ-ЖТ» Қызылорда бөлімінің басшысы Батырхан Базарбаев жедел жиын өткізіп, теміржолшылар тарапынан қолдан келген көмекті ұйымдастыруды ұсынды. Ұжымдар ортадан қаржы жинауды жөн көрсе, жекелеген адамдар көмектерін «Аманат» партиясы Қызылорда облыстық филиалы жанынан ашылған қабылдау пунктіне жеткізетін болды.
– Қостанай өңірінде орын алған төтенше жағдайға байланысты бөлімшеге қарасты мекемелердегі бастауыш ұйым жетекшілерімен қаржылай көмек жинауды ұйғардық. Қостанайлық ағайындарға ауыз су тапшы болып жатыр дегенді естіп, біз теміржолшылар алдымен соны жеткізуге тырыстық, – деді «Аманат» партиясы Теміржол филиалының атқарушы хатшысы Базара Танбаева.
Аймақтағы салалық мекеме басшылары жекелей өз аттарынан қаржылай қолдау жасаса, Өндірістік қауіпсіздік және экология қызметі бөлімінің басшысы Ғалия Көпжасарова бастаған қыз-келіншектер жылы киім-кешек, тұрмыстық қажеттіліктер тапсырды.