Қиын жағдайда қалған теміржолшыға материалдық көмек берілді
Абай облысы бойынша меншікті тілші
Өмірде не болмайды, апат аяқ астынан. Осыдан біршама уақыт бұрын Семей ЖТ бөлімшесіне қарасты техникалық қызмет көрсету пунктінің вагон қараушысы Ғ. есімді азаматтың жеке сектордағы тұрғын үйі өртеніп кеткен болатын.
Теміржолшының отбасы, анасы, зайыбы және үш баласымен бір күнде баспанасыз қалды. Дүние-мүлкі түгел отқа оранып, жер үй тұруға мүлдем жарамсыз болып қалды. Сонымен бірге, 3-ші топтағы мүгедек ұлының ем-домы мен денсаулығының күтімі де қиындық тудырды.
Осыған байланысты «ҚТЖ-Жүк тасымалы» ЖШС-нің әлеуметтік-тұрмыстық мәселелерді қарайтын арнайы комиссиясы семейлік вагон қараушыға көмек беру бойынша жиналған материалдарды зерделей отырып, өтініш берушіге 200 АЕК, яғни, 690 000 теңге көлемінде материалдық көмек беру туралы шешім қабылдады. Бүгінгі күнде өтініш беруші бөлінген қаражатты толық алды.
Тек басшылық тарап қана емес, қызметтес-әріптестері де дер кезінде көмекке келді. Олар да қал-қадірінше қаражат жинап берді. Қазіргі таңда вагон қараушы түскен қаржыға жаңадан үй салуда. Қиын сәтте қол ұшын созған барша жанашыр жандарға алғысын білдіреді.