Теміржолшылар қайырымдылық көрсетті
«Қазақстан теміржолшысы» газетінің тілшісі
Сексеуіл станциясының жастары, соның ішінде теміржолшылар да бар, кенттегі 80 отбасыға өз қаражаттарына көмір түсіріп берді.
Жалынды жастардың бұл игілікті жұмысына аудан әкімі Серік Сермағамбетов әлеуметтік желі арқылы алғысын білдірді. Қайырымды жастар қатарында «ҚТЖ-100 жас есім» жобасының қатысушылары Рустам Азишев, Қазыбек Сәдуақасов сынды белсенді теміржолшылар бар.
– Қайырымдылық іс-шарасы бізде дәстүрге айналған. Кент жастарының сауапты істері жетерлік. Жыл сайын мұқтаж жандарға берілетін көмір осы жылы 2 вагон болды. Тұрмысы төмен отбасыларға барлығы 140 тонна көмір алып бердік, – дейді теміржолшы Қазыбек Сәдуақасов.
Сексеуіл локомотив пайдалану депосы бастығының орынбасары Еркебұлан Аяғанов ауыл жастары сын сағаттарда қайырымдылық іс-қимылдарымен халықтың ризашылығына бөленіп, батасын алып келеді дейді. Айтуынша, кешегі коронавирус пандемиясы кезінде де теміржолшылар бастаған ауыл жастары осы дерттер қиналған жандар үшін өкпені желдететін аппараттар сатып әперген. Одан бөлек, Арыстағы апат, Қаңтар оқиғасы кезінде де кешіккен, тоқтап қалған пойыз жолаушыларын тамақтандырып, керек заттармен қамтамасыз етуді ұйымдастырды. Үйлері өртеніп кеткен бірнеше отбасыға баспана алып беруге де мұрындық болған осы жастар.