Жеңістің 79-шы көктемі
Қызылорда облысы бойынша меншікті тілші
Сыр өңірінде көзі тірі бірнеше соғыс ардагері қалған. Солардың бірі – 101 жастағы Төлеген Жүнісов. Қызылорда магистральдық желі бөлімшесінің директоры Ербол Сәулебеков бастаған аймақ теміржолшылары ардагерді Жеңістің 79 жылдығымен құттықтап барып, батасын алды.
Майдан даласында атқыштар полкінде оқ пен оттың арасынан шайқаса жүріп аман қалған қаhaрманмен дидарласу аймақ теміржолшылары үшін тарихи оқиға.
Ғасырдан жасы асса да Төлеген қария әріптестерін танып, көрген кезде алғысын жаудырып отырады. Теміржолшылар да оның жағдайына әркез алаңдап, назарда ұстап келеді. Керек-жарағын үнемі тауып әкеліп, көмек қолын созудан аянбайды. Бұл жолы да құр қол бармай, азықтүлік, жеміс-жидек толтырылған себетін және қаржылай сыйлық ала барып тапсырды.
– Жылдағы дәстүр бойынша майдангер Төлеген қарияға дистанция теміржолшылары атынан көмек көрсетіп келеміз. Үнемі отбасы мүшелерімен хабарласып, хал-ахуалын біліп отырамыз. Жеңіс күні қарсаңында бөлімше басшылығымен бірге келіп, құрмет көрсетіп, қарияның алғысына бөленіп, батасын алдық, – дейді дистанцияның кәсіподақ ұйымының төрайымы Ғалия Қожахметова.
1942 жылы 19 жасында әскер қатарына алынып, Өзбекстанның Самарқанд қаласына келеді. 8 айға кіші командирлікке оқуға жіберіледі. Алайда, 5 айдан соң соғысқа аттанып, майданға кіріп кетеді. Төлеген Жүнісов арнайы оқудан кейін сержант дәрежесімен соғысқа кіріп, Германияның бірнеше қаласының жауды қуып, Жеңісті Берлин қаласында қарсы алады.
Автомат пен қол пулеметін қатар меңгерген қазақ баласы Украинаны жаудан азат ету жолында ерекше ерлік жасайды. Жауынгерлік ерлігі үшін майдангер «I дәрежелі Ұлы Отан соғысы» орденімен, «Германияны жеңгені үшін», «За боевые заслуги» және «За отвагу», «КСРО Қарулы күштеріне-60 жыл», «КСРО Қарулы күштеріне-70 жыл», «Еңбек ардагері» және «Астанаға-10 жыл» секілді орден-медальдармен марапатталды.
Төлеген Жүнісовке «І дәрежелі Ұлы Отан соғысы ордені» ұрыс кезінде жаудың соғыс қимылына қажетті құрал-жабдықпен жасақталған және жан-жағын, алды-артын жіті қарап, бақылай алатын «Тигр» танкісін жарып жібергені үшін беріледі. Теміржолшы-майдангер үшін бұл марапаттың орны бөлек.