Челлендж: Бақытты әйел – бақытты ел
Қызылорда облысы бойынша меншікті тілші
Қызылорда магистарльдық желі бөлімшесінде кәсіподақтың ұйытқы болуымен «Бақытты әйел – бақытты ел» челленджі жүріп жатыр. Қоғамдағы әйелдер ролін арттыру, олардың саладағы еңбегін паш етуге бағытталған бастама теміржолшылар арасында қызу қолдау тауып отыр.
Биылғы жұмысшы мамандығы жылына орай ұйымдастырылып отырған шара Халықаралық әйелдер мерекесіне орай нәтижеленіп, қатысушылар бөлімше мен кәсіподақ ұйымының марапатын алатын болады.
Челлендж аясында әр станцияда арнайы бейнемазмұндар түсіріліп, теміржолшы әйелдердің кәсіби жұмысына бөлек отбасылық өмірі көрініс табуы тиіс. Бастама Жаңақорған теміржол вокзалының анықтама беру бойынша кезекші дикторы Нұргүл Абдуллаеваның бейнебаянынан басталды, келесі кезекті Қызылорда станциясының арулары жалғастырып әкетті.
– «Бақытты әйел – бақытты ел» челленджі Қызылорда теміржолында жұмыс істейтін әйелдердің кәсіптік жетістіктерін көрсетіп, олардың ел үшін жасаған еңбегін дәріптеп, сонымен бірге әйел-ана-жар ретінде қоғамдағы ролін паш етеді. Көпшілік бұл бастамаға ерекше ынтамен атсалысып, нәзік жандарға мерекелік көңіл-күй сыйлауда. Челлендж аясында бөлімше қызметкерлері әйелдерге гүл шоқтарын ұсынып, жылы лебіздері мен алғыстарын арнауда. Теміржол саласында еңбек етіп, отбасын құрып, бала-шаға өсіріп отырған әйел азаматтарымыз қандай құрметке болсын лайық. Олардың өмірін насихаттау арқылы жастардың бойына кәсібилікпен қатар отбасылық құндылықтарын сіңіруге ықпал етеміз деп ойлаймыз, – дейді бастаманы үйлестіруші кәсіподақ жетекшісі Салтанат Махмутова.
