Қызылордада ерекше мерекелік шара өтті

1 маусым – Балаларды қорғау күні болашақтың тұтқасы саналатын ұрпақтың мерекесі. Осы атаулы күн қарсаңында қызылордалық теміржолшылар балдырғандарға ерекше көңіл бөлді. Аймақтағы салалық мекемелердің кәсіподақ ұйымдары тарапынан ұйымдастырылған тағылымды шаралар балдырғандарға көтеріңкі көңіл күй, ата-аналарға қуаныш сыйлады. Балалар күніне арналған іс-шаралар барлық мекемелерде кең көлемде ұйымдастырылғанымен, бұл жолы біз тек магистральды желі бөлімшесіне қарасты мекемелер мен бөлімшенің қызметкерлері тарапынан өткізілген бірқатар игі бастамаларды атап өтуді жөн көріп отырмыз.

Жалпы балалар күні қарсаңында аймақта «Қазкөліккәсіп» ҚБ Қызылорда филиалы белсенділері мен Ербол Сәулебеков басқаратын Қызылорда магистральды желі бөлімшесі кәсіподақ комитетінің бастамасымен бірнеше шығармашылық байқау өткізілді. Бұл игі шараның басты мақсаты – теміржолшы отбасында тәрбиеленіп жатқан жас буынның өнерге, білімге, ұлттық құндылықтарға деген қызығушылығын арттыру.

Мереке Абай әлеміне сапардан басталды. 5-6 сынып оқушылары арасында Абай Құнанбаевтың табиғат лирикасына арналған мәнерлеп оқу байқауы өткізілді. Балалар ұлы ақынның жүрекке жылы жырларын нақышына келтіре оқып, бейнеролик түрінде жолдады. Қазақ және орыс тілінде білім алатын оқушылардың еркін қатысуына мүмкіндік берілген бұл байқау – қазақ әдебиетін насихаттаудың, Абай мұрасын бала санасына сіңірудің жарқын үлгісі болды.

Мемлекет басшысы Қасым-Жомарт Тоқаевтың Ұлттық құрылтайда «Жаппай кітап оқитын ұлтқа айналуымыз керек» деген сөзіне үн қосқан бұл байқау-рухани байлық пен көркем ойдың маңызын ұғындыруға бағытталған. Келесі сатыда аймақ балалары қалам мен парақтағы көркемдікті бедерледі. Мұнда 1-4 сынып оқушылары арасында ұйымдастырылған «Әдемі жазамын» атты каллиграфия байқауында балалар Абайдың табиғат туралы өлең жолдарын дәптерге көркем көшіріп жазды. Бұл – баланың жазу сауатын, эстетикалық талғамын, тиянақтылық пен ұқыптылыққа бейімделуін бағамдауға мүмкіндік берді.

Қолы түзудің-ойы түзу болатынына мән берген теміржолшылар баланы жасынан таза, көркем жазуға дағдыландыруды, баланың ертеңгі күні сөзге де, іске де жауапкершілікпен қарауға талпындыратын осы бір қағиданы еске салғандай болды.

Қиял мен бояудың үндестігі сипаттауға ұмтылған өрендер арасынан, 2-6 жас аралығындағы балалар арасында өткен, «Су асты әлемі» атты сурет байқауы балғын қиялдың бояумен өрілген көрінісіндей. Түрлі техникада орындалған суреттерден бала қиялының шексіздігі, табиғат пен су асты тіршілігіне деген қызығушылығы байқалды. Саусақ моторикасын, түсті сезіну қабілетін дамытатын мұндай байқаулар баланың алғашқы шығармашылық қадамына жол ашады.

«Бұл байқаулар балаға бір сәттік қуаныш қана емес, болашаққа бағыт, балаға жүрек жылуы. Әдебиетке, өнерге жақын өскен баланың танымы терең, болмысы биік болмақ. Сондықтан мұндай шаралар біз үшін жауапты миссия», - дейді кәсіподақ филиалының төрағасы Бауыржан Ахметов.

Ұлы Абайдың мерейтойын  балалар мерекесімен ұштастырған аймақ теміржолшылары байқау қорытындысында үздік шыққан қатысушыларды бағалы сыйлықтармен марапаттады. Барлық бала сый-сияпатсыз қалған жоқ.

Ұрпағын ел ертеңі санаған теміржолшы қауымы бала күлкісіне себепкер болған осындай игі бастамалар теміржолшылардың тек өндірісте ғана емес, отбасылық құндылықтар мен ұрпақ тәрбиесінде де жауапкершілік таныта білетінін көрсетті. Шын мәнінде, бұлеңбек адамдарының жүрек жылуы мен шынайы жанашырлығының көрінісі.