«Жастарға жұмыс» жәрмеңкесі өтті

Астанада Жұмысшы мамандықтар жылы аясында «Жастарға жұмыс» бос жұмыс орындары жәрмеңкесі ұйымдастырылды. Жәрмеңкеге «Самұрық-Қазына» АҚ-ның портфельдік компаниялары, соның ішінде «ҚТЖ» ҰК» АҚ да жұмыс беруші ретінде қатысты.

Жәрмеңкеге 3000-ға жуық адам келді. 70-тен астам кәсіпорын, соның ішінде ұлттық компаниялар да өз вакансияларын, яғни 1000-нан астам бос жұмыс орындарын ұсынды. Қатысушылар қатарында «ҚТЖ» ҰК» АҚ, «KEGOC» АҚ, «Қазахтелеком» АҚ, «DAR RAIL» ЖШС, «Home Credit Bank» АҚ, «Integra Construction KZ» ЖШС, «Қазмедиа орталығы» АҚ, «Богатырь Көмір» ЖШС, «Қазпошта» АҚ, «Қазақстан Халық Банкі» АҚ, Astana Hub сияқты ірі компаниялар болды.  

– Жәрмеңкеде біз бүкіл Қазақстан бойынша 500-ге тарта бос жұмыс орындарын ұсындық. ҚТЖ-да рекрутингтің автоматтандырылған жүйесі – Job.railways.kz платформасы жұмыс істейді. Үміткерлер осы платформаға түйіндеме қалдыра алады. Бұл барлық азаматтарға теңдей мүмкіндіктер береді. ҚТЖ өндірістік компания болғандықтан жұмысшы персоналға үнемі сұраныс болады. Атап айтқанда, жол монтерлері, жолсеріктер, машинистер секілді мамандықтарға бос жұмыс орындары жиі кездеседі. Бұлар – теміржолдағы қозғалыс қауіпсіздігін қамтамасыз етуші негізгі мамандықтар. Жүйе автоматтандырылғандықтан, қазір жәрмеңке Астанада өтіп жатса да, келушілер үшін еліміздің кез келген өңірінен бос жұмыс орындарын қарап бере аламыз, – дейді «ҚТЖ» ҰК» АҚ рекрутинг блогының бас менеджері Айдана Жайжумова.  

Жәрмеңке «Бір терезе» қағидаты бойынша өтті. Қатысушылар жұмыс табумен қатар мемлекеттік бағдарламалар бойынша да кеңес алды. Атап айтқанда, «Жастар практикасы», «Бірінші жұмыс орны», ипотекалық несиелер, сондай-ақ NEET санатындағы жастарға арналған JOLTAP жобасы туралы ақпараттар берілді.  

Атыраудан жұмыс іздеп келген Есбол Үмбетбаев ҚТЖ-да белгі беру және байланыс саласында жұмыс істеуге ниетті екенін айтты. Себебі бұл салада оның тәжірибесі бар.  

– Басқаруды автоматтандыру саласынан арнаулы орта және сырттай жоғары білімім бар. Астанаға көшіп келдім. Теміржол саласында жұмыс істегім келеді. «ҚТЖ» ҰК» АҚ – корпоративтік мәдениеті қалыптасқан компания. Осы бос орындар жәрмеңкесіне үміт арта келдім. Маған ҚТЖ мамандары арнайы платформа бар екенін, соған түйіндеме жіберуіме кеңес берді. Енді сол процедураларға кірісемін, – деді үміткер.  

Атап өтерлігі, соңғы екі жылда «Жастарға жұмыс» жобасы аясында 1,5 мыңнан астам іс-шара өткізіліп, 150 мыңға жуық жас қамтылған. 200-ге жуық жәрмеңке ұйымдастырылып, нәтижесінде 55 мыңнан астам жас тұрақты жұмысқа орналасыпты. Мобильді топтар шалғай ауылдарға барып, 150-ден астам елді мекенде 55 мың адамға кеңес берді. Жоба ел Президентінің 2029 жылға дейін кемінде 2,3 млн жасты жұмыспен қамту жөніндегі стратегиялық мақсатына сәйкес жүзеге асырылуда. Мұндай жәрмеңкелер соңғы үш жылда еліміздің 20 аймағында дәстүрлі түрде өткізіліп келеді. Осы уақыт ішінде елімізде 30 мыңнан астам жас тұрақты жұмысқа орналасты. Жәрмеңке жастар мен бизнес арасындағы тікелей диалог алаңына айналып, жас мамандарға нақты экономика секторында өз әлеуетін жүзеге асыруға мүмкіндік берді.