Балаларға базарлық
Атырау облысы бойынша меншікті тілші
1 маусым – Халықаралық балаларды қорғау күніне орай Атырау магистральдық желі бөлімшесінің кәсіподақ ұйымы теміржолшылардың балаларына ойын сертификатын сыйлады.
Құлсарыда – 56, Мақатта – 120, Атырау қаласында 365 бала ойын-сауық орталықтарына ойын сертификатын алып, мәз болды. Кәсіподақ ұйымының төрағасы Марат Бисенғалиевтің айтуынша, бөлімшеге қарасты барлық мекеме қызметкерлерінің балалары көңіл көтеру шараларына қатысады. Сертификат арқылы балалар жаз бойына ойын-сауық орталықтарына бара алады. Ойын баласына бұдан артық ештеңе керек емес те шығар. Шалғай станцияларда да осындай ойын-сауық шаралары өткізіліп, балаларға мерекелік көңіл-күй сыйлады.
Сонымен қатар кадр бөлімінің бастығы Анар Жалғасбаева Атырау қаласындағы Балалар үйі мен мүгедек балалар үйіне барып, қызметкерлер тарапынан ерікті түрде жиналған ойыншықтар, сурет салатын бояу, қалам-қағаз, әртүрлі тәттілер мен жылы-жұмсақтар табыстағандарын мәлімдеді.
«Біз биыл «Бақытты балалық шақ – әр баланың құқығы» атты акция ұйымдастырып, соның аясында қамқоршысы жоқ және мүгедектігі бар балаларға қайырымдылық жасауды ұйғардық. Оған ерікті түрде қатысуға ниет білдірген қызметкерлер көп болды. Жиналған нәрселердің барлығы да жас ерекшеліктеріне қарай балаларға табысталды», - дейді ол.
Кей жерлерде балаларға арнап ойындар, концерттік бағдарламалар ұйымдастырылды. Ата-аналар балаларға көтеріңкі көңіл-күй сыйлағаны үшін ұйымдастырушыларға алғыстарын жеткізді.