Білім күніне базарлық
Қызылорда облысы бойынша меншікті тілші
Қызылорда магистральдық желі бөлімшесінде «Білім әлеміне саяхат» атты мерекелік іс-шара өтті. Оған бөлімше қызметкерлерінің биыл мектеп табалдырығын алғаш аттайтын балалары қатысып, сыйлыққа оқу құралдары салынған сөмкелер алды.
Жалпы, бөлімшеде жыл сайын теміржолшылардың бірінші сыныпқа баратын балаларына сыйлық жасап, жаңа оқу жылына сәттілік тілеу дәстүрге айналған.
– Бұл – балалар мен олардың ата-аналары үшін ғана емес, барша ұжым үшін қуанышты оқиға. Кішкентай балақайларымыздың білім жолына сапарлары сәтті болсын! Зейінді, тәрбиелі, білімді болып өсіп, еліміздің мақтанышы болыңдар, – деп мектеп табалдырығын аттағалы тұрған балаларға ізгі тілегін арнады Қызылорда магистральдық желі бөлімшесі филиалының директоры Батырхан Базарбаев.
Жеті жасар балдырғандарға Білім күнімен құттықтау хаты және мектепке ұстайтын әдемі сөмкелер тарту етілді. Балаларымен бірге ата-аналары да толқынысы мен қуанышын жасыра алмауда. Іс-шараның ұйымдастырылуына бөлімшенің кәсіподақ ұйымы да белсенді атсалысты. Ұйымның төрайымы Салтанат Махмутованың ұйымдастыруымен өткен мерекелік шарада бүлдіршіндерге айрықша көңіл бөлініп, олардың жаңа оқу жылының табалдырығын жақсы әсермен аттауына жағдай жасалды.
– Биыл Қызылорда магистральдық желі бөлімшесіне қарасты Қалпына келтіру мен Өртке қарсы пойыздары, станциялар мен вокзал теміржолшыларының бірінші сыныпқа баратын 100-ге жуық бүлдіршініне мектепке қажетті оқу құралдары салынған сөмкелер табысталды. Бұл – балаларға білім күніне арналған сыйлық, сонымен қатар ата-аналарына қолдау, көмек болмақ, – деді кәсіподақ төрайымы.