Окоп қазған қазақ қызы

Атыраулық ардагер Төлеуова Қалима соғыс кезінде окоп қазған. 1925 жылы Гурьев облысы, Бақсай - қазіргі Махамбет ауданында дүниеге келген. Ата-аналары қайтыс болған соң, үлкен ағасы Тұрар Қондыбаев іні-қарындастарын өзі жұмыс жасап жатқан Ленинградқа көшіріп әкетіпті.

Тура Әлия Молдағұлованың өміртарихына ұқсас. Тұрар ағасы әуелі Орынбордың рабфагінде оқып, кейін Ленинградта геолог мамандығын алған. Кейін ол Совет Одағына белгілі геолог болған. Қалима мен Лима егіз қыз болыпты.

Тұрар аспирантурада оқып жүргенінде атақты академик Маардың он екі бөлмелі үйінің алты бөлмесін аспиранттарға берген екен. Соның бірінде бұлар тұрыпты.

Соғыс басталғанда Тұрар броньмен қалдырылып, отан қорғау ісіне пайдалы минералды заттарды іздестіруге құрылған экспедициямен Қиыр Шығысқа жіберіледі.

Ал інісі Сәкен Беларуссия ерекше әскери округіне жұмысқа жіберіледі.

Қалима болса сол кезде қоршауда қалған Ленинградты жаудан азат ету майданында, окоп қазу жұмыстарына алынады. Ас жоқ, су жоқ, қоршауда қалған қаланың тұрмысы қаншалықты қиын болғаны тарихтан мәлім. Соғыс өз алдына, адамдар аштық пен суықтан қырылып жатты...

Қаланы жау қолынан азат етіп, зауыттар мен басқа да стратегиялық маңызы бар объектілерді Ленинградтан көшірген кезде Қалима Таласбайқызы туған жері Атырауға оралады. Төлеуов Қайырболат есімді жергілікті теміржолшы жігітке тұрмысқа шығады.

Қайырболат аға пойыз құрастырушы, станция кезекшісі, Доссор станциясының бастығы болып жұмыс істейді. Ал Қалима апа Доссор станциясында билет және тауар кассирі болып 40 жыл еңбек еткен.

Төрт бала тәрбиелеп өсірген, ұлдың үлкені Төлеуов Мақсот Атырау теміржол бөлімшесінде жұмыс жасады, Атырау байланыс дистанциясында электромеханик, бас инженер, дистанция басшысы болды.

Биыл 95-ші көктемін және Жеңістің 75 жылдығын қарсы алған Қалима әжей де тың, немере-шөбере сүйіп, солардың қызығына бөленіп отыр.