Теміржолшылар өсірген бақ
Маңғыстау облысы бойынша меншікті тілші
Маңғыстау қалпына келтіру пойызының ауласында неше жылдан бері жеміс ағаштары жайқалып тұр. Мұның бәрі теміржолшылардың өз қолдарымен өсірген бақшасында пісіп жетіледі.
Біз де сол бақшадан дәм татып, мекеменің жұмыстарымен танысуға барғанбыз. Қазір жүзімнің екі сорты жеміс салып тұр екен. Әлі бабына келе пісе қоймаса да жасыл-қара болып жетіліп жатқан жеміс көркімен көз тойдырады.
Жұмыстан шаршап шыққан адамға бұл көріністі көру бір ғанибет секілді. Жеміс беріп тұрған ағаштардың саясында дем алып, арасынан күн сығалайтын жапырақтарының сыбдырына құлақ түру, шаршаған бойды сергітіп, ойды ұштайды емес пе?! Олар мұндай мүмкіндікке көктемнен қоңыр күзге дейін ие.
− Бақтың ішіне неше түрлі көкөністер де өсіріліп, жерді жақсы пайдаланған. Себебі ол уақыттарда жерге су жақсы берілген. Қазір судың жайы онша мәз болмағандықтан ағаштарды қуратып алмау үшін үнемдеп жеткізіп отырмыз. Әйтпесе бақшаның жері жақсы, су жеткілікті келсе, неше түрлі егін егуге болады. Суды «Теміржолсу» мекемесінен аламыз. Естуімізше, біраз жылдар бұрын осы мекемедегі орыс азаматтары егіп, өсірген, біз оны жалғастырып жатырмыз. Мекеме айналасына еккен қара ағаштарымыз да бой көтеріп қалды. Екі жыл бұрын отырғызған 3 алмұрт, 2 қара өрік те келер жылдары жеміс беріп қалады деп күтудеміз, – дейді Маңғыстау қалпына келтіру пойызының бастығы Маралбек Нұрмағанбетов.
Мекеме басшысының айтуынша, бақшаның жалпы аумағы 300 метр. Онда жүзім, өрік, алма, алмұрт ағаштары өседі. Бақта жаздың басынан күзге дейін жеміс болады. Піскен өнімдерін мекеме жұмысшылары теңдей бөліп алады. Биыл да жеміс маусымы басталғалы бақшада жетілген 4 түп алма, 5 түп өрік ағашынан өнім жиналыпты. Жемістерін жылдағы әдет бойынша жұмысшылар өзара үлесіп, отбасыларына алып кеткен.
Ал ол ағаштардың күтіміне келсек, оны да мекеме жұмысшылары теңдей атқарады екен. Дарақтардың астын ақтап, қураған бұтақтарын кесіп, жерін қопсытып, күш беріп, суару сияқты шаруаларды қолы босаған жұмысшы өз еркімен істей беретін көрінеді. Теміржолшылар бұл да демалыстың бір түрі деп біледі.