Маңғыстауда заңсыз мигранттарды анықтады

Маңғыстау станциясындағы желілік полиция бөлімшесінің көші-қон қызметі Маңғыстауда он күн бойы «Мигрант» жедел-профилактикалық іс-шарасын жүргізді. Халықаралық және республикалық қатынастағы жолаушылар пойыздарын, перрондар мен темір жол вокзалдарын тексеріп, заңсыз мигранттарды анықтады. Профилактикалық жұмыстар 7 маусымда басталып, 16-на дейін жалғасты. Осы уақыт аралығында Маңғыстау станциясындағы желілік полиция бөлімшесінің көші-қон тобы қызметкерлері ел заңнамасын бұзушылықтың алдын алу бойынша бірқатар жұмыс атқарды. − «Мигрант» шарасының мақсаты – құқық бұзушылықтың алдын алу және Қазақстан Республикасының территориясына заңсыз келген тұлғаларды анықтау, қызмет көрсету территориясында заңсыз көші-қон арналарын болдырмау. Осы жедел жұмыстарды жүзеге асыру барысында жақын және алыс шетел азаматтары арасында ҚР көші-қон заңнамаларын сақтау бойынша тексеріс және алдын алу шаралары өткізілді. Нәтижесінде көші-қон заңнамаларын бұзған 59 шетел азаматы анықталды. Олар ҚР ӘҚБтК-ң 517-бабы 3-бөлігі 1,2,3-тармақтарымен әкімшілік жауапкершілікке тартылды. Шетелдіктің немесе азаматтығы жоқ тұлғаның еліміздің заңнамасында белгіленген мерзім өткеннен кейін де шығып кетпеуі, ҚР халықтың көші-қон саласындағы заңнамасын түрлі деңгейде бұзу деректері кездесті, – дейді Маңғыстау станциясындағы желілік полиция бөлімшесі көші-қон қызметі тобының аға инспекторы Эльвин Исламов. Сонымен қатар, жедел-профилактикалық шара шеңберінде Маңғыстау теміржол вокзалы мен Ақтау халықаралық әуежайында жолаушыларға ағымдағы көші-қон заңнамаларының тармақтарын түсіндіруге арналған жұмыстар да қолға алынған. Онда көзделген санаттағы азматтарға «Халықтың көші-қоны туралы», «Шетел азаматтарының құқықтық ережелері туралы» заң тармақтары түсіндіріліп, шетел азаматтарының елімізде жүріп тұру ережелері ескертілген.