Аягөзде теміржолшылар үшін жаттығу залы ашылды
Абай облысы бойынша меншікті тілші
Ел шығысындағы Аягөз станциясында теміржолшылар қауымы үшін қуанышты жаңалық болды. Аягөз локомотив пайдалану депосының бас ғимараты жертөлесінен жергілікті сала қызметкерлеріне арналып спорттық жаттығу залы ашылды.
Аягөз өңірінде мұндай елеулі жаңалықтың орын алмағанына көп болған еді. Оның үстіне дәл осындай спорттық инвентарьдің түр-түрімен молынан жабдықталған тамаша жаттығу залы тек депо емес, жергілікті теміржолшылар үшін айтулы оқиға болғаны анық. Сондықтан да болар, қуанышты шараға теміржолшылар қауымы мен Аягөз шаһарындағы теміржол мекемелерінің басшылары толық жиналды.
Жаттығу залының ашылу салтанатында қазақы дәстүрмен шашу шашылып, ақжарма тілектер айтылды. Депо басшысы мен кәсіподақ ұйымының төрағасы лента қиып, атшаптырым залдың есігі көпшілікке айқара ашылды. Көпшілік осынау игілікті істің бастамашысы болған ТЧЭ-25 басшысы Алмас Жанатқалиұлы мен Ғалинұр Мырзашев бастаған салалық кәсіподақ ұйымының белсенділеріне ризашылықтарын білдіріп жатты. Арнайы жабдықталған үлкен залды аралап көріп, заманануи спорттық тренажерлардың түр-түрімен танысып, тамашалағандар қатарында әсіресе машинистер мәз-майрам. Жұмыстан соң, сапар алдында дененің құрыс-тырысын жазып, сергіп алуға мүмкіндік мол. Сондай-ақ, қан айналымын арттырып, белге түскен салмақтан да арылуға болады. Бастысы, салауатты өмір салтын қалыптастыруда теміржолшылар қауымы үшін елеулі қадам жасалды.