Қызылордада теміржолшы ардагерлер арасында шахматтан турнир өтті

Қызылорда өңіріндегі теміржолшы ардагерлер кенесінің терагасы Марат Шайжан бөлімше ардагерлерінің арасында шахмат жарысын ұйымдастырды. Өткен күннен естелік айтып, сала жұмысының бүгінгі тыныс-тіршілігін сөз еткен ардагерлердің шахмат турнирі қызықты әрі тартымды өтті.

Аймақ теміржол саласының өркендеуіне сүбелі үлес қосып, артында ұмытылмас үлгі қалдырған теміржолшы ардагерлер күні-бүгінге дейін саланың жұмысынан қол үзіп кетпей әрдайым бөлеміше теміржолшыларының тілеуін тілеп отыратын қамқор қарияға айналған. Олардың тәжірибесі, тәлім-тәрбиесі бөлімше абыройының асқақ болуына қызмет етуде. Әрдайым ізбасарларының жанынан табылатын ардагерлер шахмат жарысын өткізіп, салауатты өмір салты мен көңіл сергіту қашан да адам жанына қуат беретінін насихаттауда. Ардагерлер турына Бауыржан Ахметов басқаратын «Қазтеміркәсіп» ҚБ Қызылорда филиалының белсенділері қолдау білдірді.

Қызылорда магистральдық желі бөлімшесінің ардагерлері арасында шахмат сайысына станцияда тұратын 12 ардагер қатысты. Олардың қатарында ТЧ ардагері Асқар Тілеуқабылов, ШЧ ардагерлері Мақмұт Майгелдиев пен Әділ Мамбетoв, НОДГП ардагері Аймахан Қойшиев, ПЧ ардагері Ақылбек Әбілдаев және «Теміржолсу» мекемесінің ардагері Қалданез Айдарқұловтар болды. Қатысушылар өздерінің жоғары спорттық деңгейін көрсетіп, тартысты ойын өрнегін паш етті.

– Турнир қорытындысы бойынша 1-орынды Қалданез Айдарқұлов иеленді. Оған ардагерлер кеңесінің төрағасы Шайжан Мұхтар Абай жолы төрт томдығын сыйға тартты. 2-орынға ие болған Әділ Мамбетoв «Көшпенділер» кітабының толық жинағын алды. Ал 3-орынды иеленген Аймахан Қойшиевқа тележүргізуші Бейсен Құранбек туралы «Бейсен-болмыс» естелік кітабы табысталды. Қалған қатысушыларға «Қазақтың бата-тілектері» кітапшалары үлестірілді. Осындай тағылымды әрі тартымды жарыстар алдағы уақытта да жалғаса береді, – дейді ардегерлер кеңесінің төрағасы Марат Шайжан.

Әріптестер арасында турнир ұйымдастырып саладағы жаңалықтармен бөлісіп, бас қосу бір ғанибет болса, қызықты сәттерді өткерген жандарға жүлде ретінде кітаптың таңдалуы да тегін емес. Ардагерлер кеңесінің төрағасы бұл шешімнің астарында терең мән бар екенін атап өтті. Өмір бойы теміржол саласына қатысты сан алуан нұсқаулықтар мен қызметтік хабарламаларды оқумен өткен ардагерлер үшін кітап – үлкен қазына. Олар осылайша, оқуға деген құштарлықтың ешқашан сарқылмайтынын көрсетіп, кейінгі ұрпаққа өнеге болуды мақсат еткендей.