Сазанқұрақ станциясы нағыз кен орны

Атырау темір жолының Сазанқұрақ станциясында ширек ғасыр кезекші болып еңбек ететін кейіпкеріміздің айтуынша «Сазанқұрақ» – кен орны. Осыдан жиырма жылдай бұрын кен орны ашылғанда мұнай өнімі көп болып, тасымал тасқынын арттырған.

Сол жылдары №12 разъезд 4-ші класты Сазанқұрақ станциясы болып өзгертілді. Бастапқы жылдары аптасына екі жүздей вагон Ақсарай арқылы Ресейге, жүзге жуық вагон Махамбет станциясы арқылы өтіп, Қытайға экспортталатын. Байденов Айдарбай сол кездегі қайнаған еңбек қазанын тамсана әңгімелейді. Ол кезде пойыз құрастырушы болған теміржолшы Сазанқұрақтың жұлдызды шағын бүгінгі күнмен салыстырады. 

– Ол кезде станцияда жұмыс қайнап жатады, күніне 20-30 пойыз өтеді. 4 маневрлік жол бар. Пойыздардың бірін қабылдап, бірін жөнелтіп жататын қарбалас кез еді... Бүгінде ондай жұмыс көлемі жоқ. Станция арқылы күніне 10-15 пойыз өтеді, бірақ бәрі бірдей тоқтай бермейді, бұрынғыдай толассыз құрам жоқ. Станциядан бес шақырым жердегі Сазанқұрақ кен орнында да бүгіндемұнай қоры азайған. Аптасына 18-20 вагон жөнелтеді. Жүк тиеу кезінде 3 локомотив пайдаланылады, олар вагондарды кен орнына және кейін тасымалдап, сұрыптап, Атырауға алып кетеді. Қазір бұрынғыдай емес, станцияда бәрі дерлік автоматтандырылған, компьютерден пойыздар қозғалысы көрініп тұрады. Тек табло бұрынғы, әзірге жаңартылған жоқ. Байланыс та жақсы, Гид УРАЛ жүйесі орнатылған. Кезекшілер машинистермен радиостанциялар арқылы байланысқа шығамыз, – дейді Айдарбай Байденов. 

Кеңес кезінде Гурьев темір жол техникумын, бертін келе Тынышбаев атындағы академияны бітірген маман теміржолшылар әулетінің негізін қаласам деп армандайды.