Болашақ станциясы өсім жолында: жаңа дәреже – жаңа міндеттер

Маңғыстау теміржолының Түрікменстанмен шекаралас станциясының дәрежесі артты. Станция соңғы жылдары көрсеткен жұмыс көрсеткіштерінің көлеміне байланысты үшінші кластан бір саты жоғарыға көтерілді. Өткен айда екінші класты станция атанған «Болашақтың» болашағы әлі алда.

Межеленген міндеттерді артығымен орындап, күннен күнге жақсы нәтижелерге қол жеткізіп келе жатқан станциядағы жұмыстардың қазіргі барысы көңіл көншітерлік. Биылғы жылдың бірінші тоқсанын оң көрсеткіштермен аяқтаған станция қызметкерлері алдағы күн еншісіндегі жоспарларды орындауға білек сыбана кіріскен. Жыл сайын бірінші болып комиссиялық байқаудан өтетін станция жақында ғана көктемгі байқауға тастүйін дайындалып, жақсы баға алған болатын.  

Түйіспе станция өткен жылы да жұмысын жақсы нәтижелермен қорытындылағанын атап өткен жөн. Мәселен, былтыр Болашақ көрші елге 1 298 311 тонна жүк немесе 22 500 вагон өткізген. Түрікменстан елінен 504 пойызды қабылдап, 23 354 вагонына қызмет көрсеткен. Биылғы алғашқы үш айдың ішінде 137 пойызбен 5816 вагонды жөнелткен. Кері бағытта көршілердің 132 пойыз 6648 вагонды күтіп алып, әрі қарай діттеген мекенжайына жіберілуіне мұрындық болған. Яғни бір тоқсанда екі елдің арасында 413 887 тонна жүк алмасуды жүзеге асырған.  

– 2023-2024 жылдардағы жұмыс көлемі мен өткізген пойыздар есебі бойынша осы жылдың сәуір айынан бастап екінші класқа ауысып жатырмыз. Бірінші кезекте кластық дәрежеміздің көтерілуіне жүк көрсеткіштерінің артуы себеп болып отыр. Әрине станция мәртебесінің көтерілуі алдағы міндеттеріміздің салмағын айқындай түседі. Жауапкершілік жүгі де қазіргіден жоғарылай түспек. Ұжымымыз ауызбіршілік пен еңбектің арқасында осындай деңгейге жетті, алдағы уақытта да биік белестерді бір жағадан бас, бір жеңнен қол шығарып еңбектене жүріп бағындыра береміз. Келер жылдары жүк айналымы қазіргіден біраз есе артады деген болжам бар. Соған дайын болып, өз міндетімізді мүлтіксіз орындауға мүдделіміз. Бүгін екінші класты станция болып жатсақ, көп ұзамай бірінші санатқа көтерілуге бар күшімізді саламыз, – дейді Болашақ станциясының бастығы Мақсат Нұрбеков.  

Оның айтуынша, кейінгі жылдары станцияда жағымды өзгерістер байқалып отыр. Жұмыс орындарындағы бұрынғы компьютерлердің барлығы түгел жаңартылған. Жұмысшылардың жайлы жұмыс орнын қамтамасыз ету мақсатында кондиционерлер орнатылған. Бұдан бөлек, тоңазытқыш, қысқатолқынды пеш, тоқ шайнектер сияқты қажетті дүниелер алынып, алаңсыз жұмыс істеуге барлық жағдай жасалған.