Бейнеудің мүмкіндігі артады
Маңғыстау облысы бойынша меншікті тілші
Төрт бағытта қызмет көрсететін Бейнеу станциясының жүк қабылдап-өткізу мүмкіндіктері молая түспек. Бұған дейін станцияның «Б» паркінде жеті жол бар болса, енді тағы қосымша бірнеше жолдың құрылысы жүргізіліп жатыр.
Маңғыстау магистральдық желі бөлімшесіне қарасты станция жолдарын көбейту жұмыстары өткен жылдың күзінде басталған. Шалқар – Бейнеу қабылдау және жөнелту жолдарын дамыту, кеңейту жобасына сәйкес Бейнеудің «Б» паркіне тағы жеті жол салу жоспарланған болатын. Станция тоғыз жолдың торабында орналасқандықтан алдағы жылдардағы өткізу деңгейін есепке алып, жүзеге асырылып жатқан құрылыс жұмыстарының қазіргі қарқыны жоғары.
– Станцияда төрт бағыттан келген жүктерге қызмет көрсетіледі. Өткен жылы 8305 пойыз қабылданып, 8548 пойыз жөнелтілді. Екі мың вагоннан астам жүк түсіріліп, бес жүз вагонға жуық жүк тиелді. Станцияға қарасты Күйкен бекетінен 9878 вагон жүк тиеліп, 116 вагон жүк түсірілді. Бұл бекетке былтырғы қаңтар айынан бастап Бейнеу астық терминалы қайта іске қосылуы жүк көрсеткішін одан әрі арттырды. Станциядан өтетін жолаушылар пойызының саны да жылдан жылға көбейіп келеді. Былтыр ол 55 мыңнан асса, алдыңғы жылы 30 541 пойыз жөнелтілген. Сол сияқты жүк көрсеткіштері де салыстырмалы түрде алдыңғы жылғыдан жоғарылады. Қабылданған және жөнелтілген пойыздар 2024 жылғы көрсеткіштен 500-550 пойызға дейін артты. Сондықтан жаңадан тағы жеті жол іске қосылса, жүк операциялары кезінде туындайтын кейбір қиындық-кедергілер жойылатын болады. Бүгінде ол жолдардың бәрі де салынып, құрылысы аяқталып қалды. Қазір қабылдап, іске қосу процестері жүргізілуде, – дейді станция бастығы Бақытжан Тұраев. Бақытжан Асқарұлы он бес жыл бұрын темір жолдағы еңбек жолын Маңғыстау станциясында пойыз құрастырушы болып бастаған екен.
Тәжірибесін әр жылдары станция кезекшісі, пойыз диспетчері, Бейнеу станциясында бас инженер, бөлімшенің логистика бөлімінің инженері лауазымдарында шыңдаған. Өткен жылғы жаздан бері учаскелік және бірінші санатты Бейнеу станциясын басқарып отыр. Еске сала кетсек, Бейнеу – Мақат, Маңғыстау, Тассай, Өзбекстан бағыттарында жүк және жолаушылар пойыздары қабылданып, жөнелтілетін бірінші санатты станция. Станцияда тиеп-түсіру жұмыстарын жүзеге асыратын алты кірме жол бар.