8 айда теміржол көлігімен жүк тасымалы 4% өсті

2025 жылғы қаңтар — тамызда «Қазақстан темір жолы» ҰК» АҚ желісі бойынша тасымалдау 204 млн тоннаны құрады, бұл өткен жылдың сәйкес кезеңімен салыстырғанда 4% артық. Оның ішінде ішкі тасымалдар 114 млн тоннаға (+2%), экспорттық тасымалдар – 56,1 млн тоннаға (+8%), транзитте 19,6 млн тоннаға (+10%) жетті, деп хабарлайды Rail-news.kz.

Көрсеткіштердің өсуі негізгі номенклатуралар бойынша қамтамасыз етілген. Тас көмірдің 67,7 млн тоннасы тасымалданды, бұл өткен жылдың сәйкес кезеңінен 4% жоғары. Экспорт 21,3 млн тоннаны (+12%), Қазақстан бойынша қатты отынды тасымалдау – 44,6 млн тоннаны (+1%) құрады. Астық тасымалдау 17% өсіп, 9,1 млн тоннаға жетті, оның ішінде экспорт – 6,1 млн тонна (+52%), республикаішілік қатынаста 1,7 млн тонна (+47%).

Мұнай жүктерін тасымалдау 18,3 млн тоннаны (+8,6%), құрылыс жүктерін – 14,3 млн тоннаны (+4%), химиялық заттарды – 9,2 млн тоннаны (+9%), химиялық тыңайтқыштарды – 5,1 млн тоннаны (+16%), қара металдарды – 10,3 млн тоннаны (+9%) құрады.  

«ҚТЖ» ҰК» АҚ жүк жөнелтушілердің ішкі және экспорттық өтінімдерін уақтылы орындай отырып, тұрақты жүк тасымалын қамтамасыз етуді жалғастыруда.