ҚТЖ биыл 1,2 мың км жолға жөндеу жұмыстарын жүргізеді
«Қазақстан теміржолшысы» газетінің тілшісі
Биылғы жылы «ҚТЖ» ұлттық компаниясы темір жолдарды сауықтыру жұмыстарын жүйелі түрде жалғастыратын болады. Атап айтқанда, 1218 км жолға әртүрлі жөндеу жұмыстары жүргізілмек. Соның ішінде 567 км жол күрделі жөндеуден өтеді.
Жол және құрылыстар департаментінің мәліметінше, күрделі жөндеу жүргізу кезінде пайдаланылатын жолдың жоғарғы құрылымы материалдарының бәрі отандық өнімдер болып табылады. Болат табанды жолдардың негізін қалаушы темірбетон шпалдар «КазШпал» АҚ, «БЕНТ», «NORD Пром НС», «Магнетик» сынды отандық кәсіпорындардың шпал зауыттарынан шығарылса, жолдың астына төсейтін балласт жергілікті шағыл тас зауыттарында өндіріледі. Ал рельстер әрине Ақтөбе рельс-арқалық зауытының өнімдері болып отыр. Тек металл бұйымдары – нығайтқыштар Ресейден сатып алынады.
«Жолға күрделі жөндеу оның сипаты мен мазмұнына қарай жүргізіледі. Осы ретте аталған жөндеу түрін өткізу үшін негізгі критерийлердің бірі жолдың үстіңгі құрылымы материалдарының тозуы мен жарамсыздығын екені белгілі. Әлбетте, бұл фактілер диагностикалық кешендермен темір жолдардың техникалық жағдайын өлшеп, тексеріп өткенде және жол шаруашылығы мамандарының тексеруі барысында анықталып, тиісінше бағаланады. Жыл сайын жазғы жол жұмыстарының көлемі телімдердің өндірістік қуаттылығына, учаскелердің басымдыққа ие болуына және Компанияның қаржылық мүмкіндігіне қарай анықталады», – дейді Жол және құрылыстар департаменті директорының күрделі жөндеу жөніндегі орынбасары Нұрсұлтан Танабаев.
Ұлттық компания теміржолдарды жаңартып-жаңғырту мәселесін ұдайы назарда ұстайды. Өткен жылы 1084 км жол жөндеу түрлерінен өткен. Соның ішінде 550,6 км жол күрделі жөндеуден өтсе, 533,4 км жол түрлі жөндеуден өткен. Темір жолдарды сауықтыру нәтижесінде 1317 км жол бойында жолаушылар пойыздарының, ал 643,8 км жолда жүк пойыздарының қозғалыс жылдамдығын арттыру қамтамасыз етіліп, бірқатар телімдерде қозғалыс жылдамдығын шектеу туралы ескертпелер алынып тасталған.