Аягөз – Бақты теміржол телімінің шекарасы нақтыланды

Абай облыстық әкімдігінде теміржолшылар мен атқарушы билік өкілдері бас қосқан жиын өтті. Басты тақырып жаңадан салынатын Аягөз – Бақты теміржол телімінің шекарасын нақтылау және осы бағыттағы алдағы уақыттарда атқарылатын жұмыстарды пысықтау болатын.

Күн тақырыбындағы өзекті мәселелер қатарында Қазақстан мен Қытай шекарасын Семей – Ақтоғай телімімен байланыстыратын жаңа теміржол құрылысы үшін жерлерді резервке алу мәселесі қаралды. Аталмыш жаңа телім қазіргі Аягөз, Үржар және алдағы уақытта жаңадан құрылатын Мақаншы ауданының аумағымен өтеді. Сәйкесінше бірқатар мәселелер бар. Себебі жаңа теміржол елді мекендер іргесімен өтіп, ауылшаруашылық мақсатта пайдаланылатын аумақтарға түседі. Бұл ретте Таскескен ауылы сынды аса күрделі аумақтар бар. Осынау мәселелер бойынша негізінен жергілікті атқарушы билік өкілдері жұмыс жүргізуде.  

Айта кетер жайт, жаңа теміржол телімін сапалы салу үшін әрі жергілікті тұрғындар тарапынан реніш тудырмау үшін әлі де біршама жұмыс жүргізу қажет. Осы тарапта қажетті жер телімдерін резервке алумен айналысатын комиссия құрылды. Оның жұмысын облыс әкімінің орынбасары Айдын Кәрімов өз назарына алатын болды.  

Сонымен қатар аталмыш отырыс барысында Семей ЖТ бөлімшесі басшылығы өтінішімен комиссия мүшелері болжамды теміржол бағытын жан-жақты түрде талқылап, жер учаскелеріндегі меншік иелерінің тізімін қарастырды. Бұл орайда Семей магистральдық желі бөлімшесінің бас инженері Айдос Жаманбаев пікір білдіріп өтіп, теміржолшылар тарапынан атқарылып жатқан жұмыстар қатарымен де кең көлемде таныстырып өтті. Аталмыш шара ұлттық компания басшылығының назарында тұрғандығын айта кеткен орынды.  

Тоқтала кетерлігі, жаңа теміржол Қазақстан мен Қытай мемлекеті арасындағы тауар айналымын елеулі мөлшерде арттырып, сонымен қатар теміржол арқылы жүктерді тасымалдау инфрақұрылымын жақсарта түсуге ықпал етеді деп күтілуде.