Теміржолшылардың демалыс бөлмелері жөндеуден өтті
«Қазақстан теміржолшысы» газетінің тілшісі
Сарыағаш станциясында локомотив бригадаларының бес демалыс бөлмесі, асхана және тауар кассасы орналасқан екі қабатты әкімшілік ғимараты күрделі жөндеуден өтті.
Ғимараттың қасбеті жаңартылып, сыртқы қабырғалары қажеттілігіне қарай сырланып, жан-жағы абаттандырылды. Сонымен қатар терезелер, есіктер, сантехника, сусорғы, жылу қазандықтары, жылу жүйелері ауыстырылды. Ғимараттың кір жуатын бөлмедегі техникалық қабатында кафельдері ауыстырылып, қабырғалары сырланды. Қызметкерлер тұратын үйлер күрделі жөндеуден өтті. Кассирлер мен демалыс бөлмесінің кезекшілері үшін қолайлы жұмыс орындары жасалған.
– Мұнда тәулігіне сапар арасында 16 локомотив бригадасы, яғни машинист пен олардың көмекшілері, барлығы 32 адам демалып, күш жинайды. Көбінесе Арыс пен Шымкент депосының теміржолшылары тоқтайды. Олар үшін жарық әрі кең екі орынды залдар қашанда дайын тұр. Тамақтану бөлмесі қажетті ыдыс-аяқпен және ас құралдарымен, сондай-ақ тұрмыстық техникамен жабдықталған, яғни плита, шәйнек, тоңазытқыш бар, – дейді Сарыағаш станциясының бас инженері Сәкен Амиров.
«ҚТЖ-Жүк тасымалы» ЖШС өз қызметкерлеріне қолайлы демалыс және қауіпсіз еңбек жағдайын жасауды негізгі әлеуметтік міндеті деп санайды. Ағымдағы жылы Пресногорьковская, Сексеуіл, Ақсу-1, Маңғыстау, Сарышаған, Шу, Құлсары, Қарағайлы, Жезқазған, Саяқ, Арыс, Сарыағаш, Қызылорда, Мақат, Ақтөбе және Шиелі станцияларында локомотив бригадаларының 16 демалыс үйі күрделі жөндеуден өтті. Тағы да 22 демалыс үйін жөндеу жұмыстары кестеге сай барлық нормалар мен талаптарды сақтай отырып жүргізілуде.