Семей вокзалының аумағы абаттандырылады

Семей магистральдық желі бөлімшесінің бастығы Айдын Шәукежанов облыс орталығындағы теміржол вокзалында көшпелі кеңес өткізді. Вокзал шаруашылығының қызметкерлері, қала әкімі, жергілікті атқарушы билік өкілдері қатысқан жиынға алдағы уақытта теміржол бекетін абаттандыру мәселелері талқыланды.

Жалпы, Семей теміржол вокзалының түп тарихы 1915 жылдан, сонау Алтай теміржолынан басталады. Ал, бүгінгі ғимараттың қайта салынғанына биыл 50 жыл толады. Қазақ теміржолында ғасырлық тарихы бар әйгілі вокзал бүгінгі таңда жолаушылар тасымалында 7 бағыт бойынша қызмет көрсетеді. Қауіпсіздік талаптары күшейтілген. Алайда, күніне 2000-ға жуық  адамды шартарапқа аттандыратын аталған нысанның маңайын абаттандыру күн талабына шығып отыр. Жаз басталысымен қала маңы тасымалы бойынша тағы екі бағыт іске қосылып, жолаушылар нөпірі тіптен көбейген.  

Көшпелі кеңес барысында НЖС-6 басшысы Айдын Мақсұтбекұлы осыған дейін вокзалдың шаруашылық тәсілмен жөндеуден өткенін айтып өтті. Алайда, оның маңайындағы қалалық әкімдік теңгеріміндегі аумақтарды жөндеуден өткізу қажет. Бұл орайда теміржолшылар қауымы қалалық жолаушылар көлігі және автомобиль жолдары бөлімі басшылығына вокзал айналасына жол сызықтарын таңбалауды, архитектура бөліміне жыртылған жарнамалық баннерларды алуды және рұқсатсыз орнатылған темір конструкцияларды бөлшектеуді ұсынды. Бұл шараларды қала басшылығы да құптап, тиісті бөлімдер басшыларына вокзал маңын ретке келтіру бойынша нақты тапсырмалар берді.

Сондай-ақ, қала әкімі тарапынан тұрғын үй инспекциясы бөліміне вокзал жанында тұрған, бөлімшенің бас ғимаратына қарама қарсы орналасқан 16 қабатты зәулім тұрғын үйдің қасбетін бояуды жоспарға алу тапсырылды. Бұл алып тұрғынүй кешенінде негізінен теміржолшылар тұрады.

Сонымен қатар, көшпелі кеңес барысында қала басшылығы қаланың қақпасы саналатын вокзалдың ішін және сыртқы қасбетін абаттандыру жұмыстарын жүргізуді сұрады. Бұл орайдағы шаралар алдағы уақытта кеңес барысында жан-жақты түрде пысықталмақ.

Жұмыс тобы көшпелі кеңес барысында теміржол вокзалы маңындағы, желі бойына жақын орналасқан аула аумақтарын аралап, ол жерлерде жүргізіліп жатқан күрделі жөндеу, абаттандыру шараларын да назарға алды. Осы қарқынмен вокзал маңайы да көркейтілуі тиіс.