Бақты-Аягөз телімі: бас инвестор белгілі болды

Теміржол саласында мемлекеттік-жекеменшік әріптестік тәсілімен қаржыландырылып, жүзеге асыру көзделген ауқымды жобалардың бірі Бақты-Аягөз телімінің құрылысы жыл аяғына дейін қарқын алады деп күтілуде.

Қазақстан мен Қытай арасындағы жүк тасымалын 20 млн тоннаға ұлғайтуға мүмкіндік беретін бірегей жоба деп бағаланып отырған теміржол құрылысының ұзындығы 272 шақырымды құрайды. Жеке инвестициялар есебінен жүргізілетін құрылыстың қазіргі уақытта техникалық-экономикалық негіздемесі дайын, барлық қажетті рәсімдер аяқталған. Семей ЖТ бөлімшесі басшылығы облыстық әкімдікпен бірлесіп жол салынатын аумақты бірнеше мәрте жүріп өтіп, бірқатар мәселелерді пысықтады. Жер рельефі өте күрделі болуына байланысты жол тартылатын жерлер бірнеше рет өзгерді. Жол төселетін жер телімдері бүгінде резервке қойылды. Сонымен қатар қайта ресімдеуге және сатуға мораторий жарияланды. Абай облысының әкімі Нұрлан Ұранхаев жуырда ҚР Президенті жанындағы Орталық коммуникациялар қызметінде өткен брифинг барысында құрылыстың бас инвесторын таныстырды. Global Trans Company компаниясы құрылыс жұмыстарын таяу арада қарқынды жүргізе бастамақ. Ал телімнің аяқталу мерзімі – 2027 жыл. Жалпы құны шамамен 577,5 млрд теңге болып отыр.  

Құрылыс кезінде жұмысқа 1700-ге жуық адам тартылады деп болжанып отыр. Қазірдің өзінде шамамен 318 адам тартылған. Олар негізінен инженерлік құрам. Ал көпшілік жұмыстарға негізінен жергілікті тұрғындар тартылатын болады. Бұл орайда облыстық әкімдік, инвестор және ұлттық компания арасында тиісті уағдаластық бар.  

Құрылыс барысында 11 станция, 47 көпір, 23 теміржол және 8 автомобиль өткелі, 5 жаяу жүргіншілер көпірі, 16 бақылау құрылыстары салынады. Осы мақсатта отандық өндірушілерден 500 мың бірліктен астам шпал және 36 мың рельс сатып алу жоспарлануда. Жергілікті қамту кем дегенде 85 пайыз болады деп күтілуде.