Семей теміржолында инфрақұрылым жаңаруда

Семей ЖТ бөлімшесінде теміржол инфрақұрылымын дамыту бойынша жаңа жобалар қолға алынып, сәтімен жүзеге асырылуда. Оның ішінде вокзалдарды қайта жаңғырту мен халықаралық жобаларды ерекше атап өтуге болады.

Қазіргі күні Семей, Жаңасемей, Аягөз, Шар, Жаңғызтөбе, Үшбиік, Жарма, Ауыл, Белағаш және Таңсық станцияларында 10 вокзал жұмыс істеп тұр. Осыған дейін көлік қызметтерінің қолжетімділігін арттыру үшін әлеуметтік маңызы бар екі қаламаңы пойызы іске қосылған. Бір вагонды «Семей-Шар» бағыты аптасына алты рет қатынайды. Билет құны – 557 теңге. Ал екі вагонды құрам «Ақтоғай-Аягөз» арасына аптасына бес рет жөнелтіледі. Жол ақысы – 650 теңге. Қаламаңы бағдарларына сұраныс бар. Алдағы уақытта Семей – Дегелең, Семей – Ауыл станциялары бойынша жаңа бағыттар ашу қарастырылуда. Сонымен  қатар туристік бағытқа да ерекше назар аударылуда. Жыл сайын жаз маусымында 731 км болатын «Семей-Жалаңашкөл» бағыты бойынша жолаушылар пойызы тұрақты түрде қатынайды. Айта кетерлігі, бұл үш бағыт та субсидияланатын санатқа жатады.

Аймақтағы инфрақұрылымдық жобалар қатарында Семей, Аягөз қалалары мен Ақтоғай кентіндегі теміржол вокзалдарын қайта жаңғыртуға дайындық жүргізілуде. Биыл Семей ЖТ бөлімшесі, «Абай облысының жолаушылар көлігі және автомобиль жолдары басқармасы» ММ және «ТехСтройПроект» ЖШС арасында жобалық-сметалық құжаттаманы әзірлеу бойынша арнайы Меморандумға қол қойылды. Жобаны биыл іске асыру жоспарлануда.

Жалпы қайта құрылған облыстың теміржолы ішкі бағыттарды ғана емес, облысаралық және халықаралық бағыттарды да қамтиды. Бүгінде Семей – Қызылорда, Павлодар – Алматы, Семей – Маңғыстау, Өскемен – Астана, Өскемен – Алматы, Семей – Алматы, Семей – Астана және Семей – Қарағанды бағыттары бойынша 8 жұп жолаушылар пойызы тұрақты түрде қатынайды. Мұнымен қоса семейлік теміржолшылар Новосибирск – Бішкек бағыты бойынша сапар шегетін халықаралық транзиттік пойызға да қызмет көрсетеді.