Жол техникалары сапқа қойылды
Абай облысы бойынша меншікті тілші
Семей ЖТ бөлімшесі бойынша алдағы қысқы маусымға даярлық шаралары аясында жол машиналары да күрделі жөндеуден өтіп, әзірліктің соңғы сатысына келтірілді. Сонымен қатар жол бойындағы жұмыстар үшін қосымша техникалар сатып алынуда.
Мәселен, осыдан біраз бұрын Аягөз станциясындағы қалпына келтіру пойызына Киров машина жөндеу зауытынан шыққан, жүк көтергіштігі 150 тонна болатын жаңа КЖ-1572Б гидравликалық рельсті кран сатып алынды. Бұл техника тиеу-түсіру жұмыстарын жеңіл атқарып, 1520 мм калибрлі теміржолда апаттық жөндеу жұмыстарын жүргізуге арналған. Сонымен қатар жөндеу, құрылыс және монтаж жұмыстарына пайдаланылады.
Басты ерекшелігі, бұл кран -40°C-тан төмен температурада да жұмыс істей алады. Сол себепті Аягөз өңірінің қатаң табиғатында мейлінше тиімді. Бұл шаралардың сыртында жаңа кран жұмыстың өнімділігін арттырып қана қоймай, жұмысты аяқтауға кететін уақытты да айтарлықтай қысқартады.
Сол тәрізді қазіргі таңда жол жөндеу жұмыстарын тиімді жүргізетін арнайы машина алынды. Заманауи жаңа техника небары 8 сағаттың ішінде 100-ден аса шпалды ауыстыра алады. Бұл жолшылар жұмысын айтарлықтай жеңілдетті. Дәл қазір Нарбота станциясының аумағында жұмыс жүргізіп жатқан жол машинасына жолшылар дән риза.
Жалпы, техникалық әлеуетті жаңарту аясында соңғы уақыттардың өзінде теміржолшылар игілігі үшін жаңадан 13 көлік алыныпты. Соның ішінде аса күрделі жағдайда жұмыс істеу үшін бір «ЧЕТРА Т-35» бульдозері де жеткізілген. Сонымен қатар жолшыларға бұрыннан жақсы таныс РМ, Дуомат, Унимат, РШП және ПРСМ машиналарымен жол сауықтыру жұмыстары тиімді жүргізілуде.
Десек те, алдағы қатал маусымға орай жолды қар мен мұздан тазартатын техникалардың даярлығына баса мән берілуде. Бұл орайда желтоқсан айында басталатын қар сенбіліктері мен желі бойын ақ ұлпадан тазарту жұмыстарына СМ-2, СМ-7Н, СМ-5, ПСС-1 сынды қар тазалау техникасы мен қар жинағыш пойыздар даярлықтың соңғы сатысына келтірілді. Биылғы қысқы маусымға мұндай техниканың 13 бірлігі толық даярлықпен кіргізілмек. Мұнымен қатар бөлімше көлемінде ФРЭС-2, ЭСО-3 типті қар жинайтын техникалар арнайы бекітілген тепловоздардың көмегімен жұмыс істейді. Бұл техникалардың көмегі әсіресе Өскемен мен Аягөз өңірі және «солтүстік тармақ» аталатын ең күрделі Семей мен Локоть телімінің аралығы үшін тиімді болмақ.