Вокзал құрылысы бақылауда

Мемлекет басшысы Қасым-Жомарт Тоқаевтың тапсырмасымен еліміз бойынша теміржол вокзалдарына қайта жаңғырту жұмыстары жүргізіліп жатыр. Соның аясында қазіргі уақытта «Қазақстан темір жолы» ұлттық компаниясының арнайы тапсырысымен Семей ЖТ бөлімшесіндегі 13 теміржол вокзалы жөнделуде.

Аталмыш нысандардың 8-і Абай облысының аумағында болса, қалған бесеуі Шығыс Қазақстан облысында орналасқан. Солардың ішіндегі ең ауқымдысы әрі күрделісі 110 жылдық тарихы бар Семей теміржол вокзалының құрылысы болып отыр. Жақында Абай облысы әкімі Берік Уәли бастаған атқарушы билік өкілдері Семей ЖТ бөлімшесінің басшысы Алмас Сейсемқанов пен магистральдық желі бөлімшесінің директоры Айдын Шәукежановтың қатысуымен вокзал құрылысын аралап көрді.  

Құрылыс алаңындағы шағын жиында мердігер ұйым өкілдері атқарылып жатқан жөндеу жұмыстары мен бірегей жобаның негізгі бағыттарын таныстырып шықты.

Жалпы ауданы 3037,9 шаршы метрді құрайтын вокзал ғимаратында соңғы рет 1972 жылы қайта құру жұмыстары, ал 2013 жылы күрделі жөндеу жүргізіліпті. Түп тарихы 1915 жылдан бастау алатын нысанның сырты заманауи еуропанельдермен қапталып, аумағы кеңейтілуде. Қазіргі таңда демонтаждау және шатыр жабу жұмыстары орындалған. Сонымен қатар инженерлік желілерді жаңарту жұмыстары да жалғасуда.  

Семей магистральдық желі бөлімшесі басшысы Айдын Мақсұтбекұлының айтуынша, жоба барысында қауіпсіздік, қолжетімділік және сервистік қызмет көрсету деңгейіне ерекше көңіл бөлінген. Яғни жолаушыларға қолайлы жағдай жасау бірінші кезектегі маңызды орында тұр.  

– Жоспарға сәйкес, қайта жаңғыртудан өткен Семей теміржол вокзалы 2026 жылдың IV тоқсанында пайдалануға беріліп, қала тұрғындары мен қонақтарына заманауи талаптарға сай қызмет көрсететін болады. Ал әзірге жөндеу жұмыстары кезінде жолаушыларға қолайлы жағдай жасау мақсатында вокзал ғимаратының оң жағында жалпы ауданы 85 шаршы метрді құрайтын уақытша қызмет көрсету орындары ұйымдастырылған. Бұл орындар қолайсыз ауа райы жағдайында жолаушыларға қызмет көрсетуге арналған. Жалпы, қазіргі күні жолаушылар тарапынан ешқандай шағым жоқ, – дейді Семей магистральдық желі бөлімшесі директорының вокзал шаруашылығы бойынша орынбасары Нұрлан Жақсылықұлы.  

Вокзал ғимаратын аралап көрген аймақ басшысы мердігер ұйымға атқарылып жатқан жұмыстардың сапасына мән беріп, белгіленген кестеге сай орындауды қатаң түрде тапсырды.