Бақты-Аягөз желісінің құрылысы талқыланды
Абай облысы бойынша меншікті тілші
Жуырда Абай облысы әкімдігінде «Бақты-Аягөз» теміржол құрылысының жүзеге асырылу барысы кең көлемде талқыланды. Жиынға атқарушы билік өкілдері мен мердігер компания басшыларынан бөлек «ҚТЖ» ҰК» АҚ Жаңа жобалар жөніндегі басқарушы директоры Илья Мещеряков және ұлттық компанияның Семей филиалы директоры Алмас Сейсемқанов қатысты.
Жиында Президент Қасым-Жомарт Тоқаевтың «Бақты-Аягөз» теміржол желісін уақытылы пайдалануға беру тапсырмасын іске асыру аясында стратегиялық маңызы бар инфрақұрылымдық жобаның жүргізілу барысы жан-жақты сөз болды. Елдің көлік-транзиттік әлеуетін арттыру мақсатында салынып жатқан Қазақстан – Қытай арасындағы үшінші теміржол желісінің құрылысы, қажетті шаралар мен жоспарлар талқыланды.
ҚТЖ-ның Жаңа жобалар жөніндегі басқарушы директоры Илья Николаевич жобаның жүзеге асырылу барысын жан-жақты баяндады. Жалпы «Семей-Ақтоғай» учаскесіне шығатын «Бақты-Аягөз» теміржол желісінің ұзындығы 297 шақырымды құрайды. Жоба аясында 11 станция, 47 көпір, 23 теміржол және 8 автокөлік жол көпірі, 5 жаяу жүргінші көпірі, 16 бақылау құрылымы салынады. Бас мердігер – China Harbour Engineering Company Co. Ltd компаниясы.
Бүгінде құрылысқа 144 техника мен 398 адам жұмылдырылған. Қазіргі жұмыс жалпы ұзындығы 42 шақырым учаскеде жүргізіліп жатыр. Ал «Бақты-Аягөз» жобасын толыққанды іске асыру еліміздің Қазақстан – Қытай шекарасындағы өңірдің негізгі көлік-логистикалық хабы ретіндегі ұстанымын мейлінше нығайта түседі. Оның сыртында бұл жоба мыңнан астам жаңа жұмыс орнын құруға мүмкіндік береді.
Абай облысының әкімдігі тиісті заңнама аясында аталмыш құрылыстың мерзімінде әрі сапалы орындалуына барынша қажетті қолдауды көрсететінін жеткізді. Себебі бұл құрылыс қайтадан құрылған облыс үшін стратегиялық маңызы бар ірі инвестициялық жоба.
Жалпы, қазіргі таңда жаңа жоба Семей магистральдық желі филиалы басшылығының назарында тұр. Құрылыс барысы талапқа сай, кесте бойынша кедергісіз жүргізілуде. Жобаны толық көлемде аяқтап, қолданысқа беру уақыты келер жылдың желтоқсан айына белгіленіп отыр.